Vijaysai Reddy: రాష్ట్రవ్యాప్తంగా పెను ప్రకంపనలు సృష్టించిన కాకినాడ పంచాయతీరాజ్ ఏఈ తిల్లపూడి నూకరాజు కుటుంబం సామూహిక ఆత్మహత్య కేసులో మరో సంచలన కోణం వెలుగులోకి వచ్చింది. ఈ విషాద ఘటన వెనుక స్పష్టమైన ‘లవ్ జిహాద్’ కోణం ఉందని వైఎస్సార్సీపీ మాజీ రాజ్యసభ సభ్యుడు విజయసాయిరెడ్డి తీవ్ర ఆరోపణలు చేశారు.
ఈ ప్రమాదం నుంచి ప్రాణాలతో బయటపడిన పదేళ్ల చిన్నారి రియాన్ష్ కార్తికేయ రెడ్డిని పరామర్శించిన అనంతరం, ఆత్మహత్యకు ముందు సౌజన్య రాసిన 5 పేజీల మరణ వాంగ్మూలంలోని కీలక అంశాలను ఆయన తన సోషల్ మీడియా (X) వేదికగా ప్రజల ముందుంచారు.
రాష్ట్రంలోని ప్రతి మహిళ ఈ లేఖ చదవాలి – విజయసాయిరెడ్డి..!
ఈ ఘటన కేవలం ఒక కుటుంబానికి చెందిన వ్యక్తిగత విషాదం కాదని, సమాజం అంతా ఆలోచించాల్సిన తీవ్రమైన సమస్య అని విజయసాయిరెడ్డి పేర్కొన్నారు:
-
రాజకీయ ఒత్తిళ్లతో దాచే ప్రయత్నం: “కొన్ని రాజకీయ శక్తులు ఇలాంటి దారుణాలను తొక్కిపెట్టే ప్రయత్నం చేస్తున్నాయి. అందుకే బాధితురాలు సౌజన్య తన సూసైడ్ నోట్లో రాసిన వాస్తవాలను సమాజానికి, రాష్ట్రంలోని ప్రతి మహిళకు తెలియజేసేందుకే బహిర్గతం చేస్తున్నాను” అని ఆయన తెలిపారు.
-
చిన్నారికి అండగా ఉంటామని భరోసా: తల్లిదండ్రులు, తాతమ్మలను కోల్పోయి ఒంటరిగా మిగిలిన బాలుడు రియాన్ష్ రెడ్డికి అన్ని విధాలా అండగా ఉంటామని భరోసా ఇచ్చారు.
సౌజన్య లేఖలోని దిగ్భ్రాంతికర నిజాలు..
విజయసాయిరెడ్డి విడుదల చేసిన 5 పేజీల లేఖలో నిందితుడు సాధిక్ ఖాన్ సాగించిన అరాచకాలు విస్తుపోయేలా ఉన్నాయి:
-
నమ్మించి వల వేసిన వైనం: మా నాన్న నూకరాజు ఎంతో కష్టపడి గౌరవంగా బతికే వ్యక్తి. నా వల్ల ఆయన పరువు పోకూడదని జాగ్రత్తపడ్డాను. నా కుమారుడు రియాన్ష్ను ఆడిస్తూ, నాతో మంచిగా మాట్లాడుతూ సాధిక్ మా కుటుంబ విషయాలన్నీ తెలుసుకున్నాడు. ఆ తర్వాత నా ప్రైవేట్ విషయాలను అడ్డం పెట్టుకుని బ్లాక్మెయిల్ చేయడం, దాడి చేయడం మొదలుపెట్టాడు.
-
విషమిచ్చి భర్త హత్య?: సాధిక్ వేధింపులు తాళలేక నా భర్త జగదీశ్వర్ రెడ్డికి విషయం చెప్పాను. కానీ సాధిక్ నా భర్తపై కూడా దాడి చేశాడు. ఆ తర్వాత ముంబై, కెనడా నుంచి తెప్పించిన అత్యంత ప్రమాదకరమైన కెమికల్ నా భర్తకు ఇచ్చి చంపేశాడు.”
-
ఆస్తుల దోపిడీ & మతం మారాలంటూ ఒత్తిడి: భర్త మరణం తర్వాత మా ఇంటి తాళాలు, బ్యాంక్ లాకర్లు, నాన్న స్థలం ఒరిజినల్ డాక్యుమెంట్లు అన్నీ సాధిక్ లాక్కున్నాడు. ఇస్లాం మతంలోకి మారాలని బలవంతం చేశాడు. పోలీసుల వద్దకు వెళితే దొంగ కేసులు పెట్టిస్తానని, ఉప్పాడ తీసుకెళ్లి చంపేస్తానని బెదిరించాడు.
-
ఆఖరి నిర్ణయం: సాధిక్ పెట్టిన నరకం భరించలేక, మేము చనిపోతే నా కొడుకును కూడా బతకనివ్వడనే భయంతో అందరం గోదావరిలో దూకి చనిపోవాలని నిర్ణయించుకున్నాం. మా ఐదుగురి ప్రాణాలు పోవడానికి సాధిక్ మాత్రమే కారణం. వాడికి దేవుడే తగిన శిక్ష వేస్తాడు.
ఈ లేఖలోని అంశాలు ఇప్పుడు పోలీసు దర్యాప్తులో అత్యంత కీలకంగా మారాయి. నిందితుడిపై నమోదైన హత్యాయత్నం, ఆత్మహత్య ప్రేరణ కేసులతో పాటు ఆర్థిక దోపిడీ, బెదిరింపుల కోణాల్లోనూ పోలీసులు ఆధారాలు సేకరిస్తున్నారు.
