SIM Card Rules 2026: సైబర్ మోసాలు, నకిలీ పత్రాలతో తీసుకునే కనెక్షన్లకు అడ్డుకట్ట వేసేందుకు కేంద్ర టెలికమ్యూనికేషన్ల శాఖ (DoT) సిమ్ కార్డుల జారీ నిబంధనలను మరింత కఠినతరం చేసింది. ఆగస్టు 24 నుంచి అమల్లోకి రానున్న మార్గదర్శకాల ప్రకారం.. అనుమతించిన గరిష్ఠ పరిమితికి మించి సిమ్ కార్డులు ఉన్న వ్యక్తులకు జియో, ఎయిర్టెల్ వంటి టెలికాం కంపెనీలు కొత్త సిమ్ కార్డులను జారీ చేయకూడదు.
సిమ్ కార్డుల పరిమితి నిబంధనలు..
-
గరిష్ఠ పరిమితి: దేశంలో ఒక వ్యక్తి పేరుపై (అన్ని టెలికాం నెట్వర్క్లు కలిపి) గరిష్ఠంగా 9 మొబైల్ కనెక్షన్లు మాత్రమే ఉండాలి.
-
ప్రత్యేక రాష్ట్రాల్లో పరిమితి: జమ్మూకశ్మీర్, అసోం సహా ఈశాన్య రాష్ట్రాల వినియోగదారులకు ఈ గరిష్ఠ పరిమితి 6 సిమ్ కార్డులు మాత్రమే.
-
దరఖాస్తులో పాత నంబర్లు తప్పనిసరి: ఇకపై ఎవరైనా కొత్త సిమ్ కోసం దరఖాస్తు చేసుకున్నప్పుడు.. తమ పేరుపై ఇప్పటికే వేర్వేరు కంపెనీల్లో ఉన్న అన్ని ఫోన్ నంబర్ల వివరాలను ఫారంలో స్పష్టంగా పేర్కొనాల్సి ఉంటుంది.
డిజిటల్ ఇంటెలిజెన్స్ ప్లాట్ఫామ్ – ఫోటో ఆధారిత తనిఖీ..
నిబంధనలు పక్కాగా అమలయ్యేందుకు ప్రభుత్వం ప్రత్యేక సాంకేతిక వ్యవస్థను తీసుకొచ్చింది..
-
డిజిటల్ ఇంటెలిజెన్స్ ప్లాట్ఫామ్ (DIP): అన్ని టెలికాం సంస్థలు వినియోగదారుల డేటాను ఈ ఉమ్మడి ప్లాట్ఫామ్లో అనుసంధానిస్తాయి. ఒక వ్యక్తికి ఇప్పటికే ఎన్ని కనెక్షన్లు ఉన్నాయో టెలికాం కంపెనీలు కొత్త సిమ్ ఇచ్చే ముందే క్రాస్-చెక్ చేసుకుంటాయి.
-
ఫోటో ఐడెంటిఫికేషన్: పరిమితి దాటిన వినియోగదారుల కోసం ఫోటో ఆధారిత గుర్తింపు ఫీచర్ను సైతం అందుబాటులోకి తెస్తున్నారు.
-
నిబంధనలు మీరితే సస్పెన్షన్: పరిమితికి మించి తీసుకున్న కనెక్షన్లను వెంటనే గుర్తించి నిలిపివేస్తారు. టెలికాం కంపెనీలు తమ వ్యవస్థలను ఈ ప్లాట్ఫామ్తో అనుసంధానించేందుకు నవంబర్ 30 వరకు గడువు ఇచ్చారు.
మీ పేరుపై ఎన్ని సిమ్లు ఉన్నాయో తెలుసుకోవడం ఎలా?:
మనకు తెలియకుండా మన గుర్తింపు కార్డులపై ఇతరులు ఏవైనా నంబర్లు తీసుకున్నారా అని తెలుసుకోవడానికి ప్రభుత్వం ‘సంచార్ సాథీ’ (Sanchar Saathi) పోర్టల్ను అందుబాటులో ఉంచింది..
-
స్టెప్ 1:
sancharsaathi.gov.inవెబ్సైట్లోకి వెళ్లండి లేదా మొబైల్ యాప్ను ఓపెన్ చేయండి. -
స్టెప్ 2: హోమ్పేజీలో “Know mobile connections in your name” (TAFCOP) ఆప్షన్ను ఎంచుకోండి.
-
స్టెప్ 3: మీ ప్రస్తుత మొబైల్ నంబర్ మరియు క్యాప్చా (Captcha) ఎంటర్ చేసి, ఓటీపీ (OTP) పొందండి.
-
స్టెప్ 4: ఓటీపీ నమోదు చేసిన తర్వాత మీ గుర్తింపు పత్రంపై యాక్టివ్గా ఉన్న అన్ని మొబైల్ నంబర్ల జాబితా కనిపిస్తుంది.
-
స్టెప్ 5: ఆ జాబితాలో మీకు తెలియని లేదా మీరు ఉపయోగించని నంబర్లు ఏవైనా ఉంటే.. అక్కడే రిపోర్ట్ చేసి వాటిని రద్దు చేయాలని అభ్యర్థించవచ్చు.
సైబర్ భద్రతను పటిష్టం చేయడంతో పాటు పౌరుల గుర్తింపు పత్రాలు దుర్వినియోగం కాకుండా కాపాడటానికి ఈ కొత్త నిబంధనలు ఎంతగానో ఉపయోగపడతాయి.