Konda Surekha: తెలంగాణ అధికార కాంగ్రెస్ పార్టీలో అంతర్గత విభేదాలు ఒక్కసారిగా భగ్గుమన్నాయి. ముఖ్యమంత్రి ఎ. రేవంత్ రెడ్డిపై అటవీ, దేవాదాయ శాఖ మంత్రి కొండా సురేఖ కుమార్తె కొండా సుస్మిత పటేల్ చేసిన ఘాటు వ్యాఖ్యల వ్యవహారం చిలికి చిలికి గాలివానలా మారింది.
ఈ క్రమంలో సుమారు 15 మంది కాంగ్రెస్ ఎమ్మెల్యేలు, ఐదుగురు ఎమ్మెల్సీలు శుక్రవారం హైదరాబాద్లోని సీఎల్పీ (CLP) కార్యాలయంలో సమావేశమై, మంత్రి కొండా సురేఖపై తీవ్రస్థాయిలో ఆగ్రహం వ్యక్తం చేశారు. పార్టీ వ్యతిరేక కార్యకలాపాలకు పాల్పడుతున్నారంటూ ఆమెను తక్షణమే మంత్రివర్గం నుంచి బర్తరఫ్ చేయాలని, పార్టీ నుంచి సస్పెండ్ చేయాలని కాంగ్రెస్ అధిష్ఠానాన్ని (AICC) మరియు ముఖ్యమంత్రిని గట్టిగా డిమాండ్ చేశారు.
కుమార్తె వ్యాఖ్యలతో సంబంధం లేదంటే ఎలా?
సీఎల్పీ మీడియా సమావేశంలో ఎమ్మెల్యేలు నాయిని రాజేందర్ రెడ్డి, వేముల వీరేశం, నేనావత్ బాలునాయక్, బీర్ల ఐలయ్య, వెడ్మ బొజ్జు, వీర్లపల్లి శంకర్, ఎమ్మెల్సీ బల్మూరి వెంకట్ తదితరులు మాట్లాడారు..
-
మంత్రిగా ఎందుకు ఖండించలేదు?: సీఎం రేవంత్ రెడ్డిపై సుస్మిత ఏకవచనంతో మాట్లాడుతూ తీవ్ర ఆరోపణలు చేశారు. ఆ వ్యాఖ్యలతో తనకు సంబంధం లేదని కొండా సురేఖ తప్పించుకునే ప్రయత్నం చేయడం సరికాదు. నిజంగా సంబంధం లేకపోతే వాటిని మంత్రిగా ఎందుకు బహిరంగంగా ఖండించలేదు? కుమార్తె వ్యాఖ్యలకు నైతిక బాధ్యత వహిస్తూ ఆమె రాజీనామా చేయాలి, లేదంటే ప్రభుత్వం నుంచి తొలగించాలి” అని డిమాండ్ చేశారు.
-
బ్లాక్మెయిల్ రాజకీయాలు ఇక సాగవు: వరంగల్ పశ్చిమ ఎమ్మెల్యే నాయిని రాజేందర్ రెడ్డి మాట్లాడుతూ.. ఉమ్మడి వరంగల్ జిల్లాలో కొండా కుటుంబం ఏ ఒక్క ఎమ్మెల్యేతోనూ సఖ్యతగా లేదని మండిపడ్డారు. పార్టీ కష్టకాలంలో ఉన్నప్పుడు వేరే పార్టీల్లోకి వెళ్లి, ఇప్పుడు అధికారంలోకి వచ్చాక బ్లాక్మెయిల్ రాజకీయాలకు పాల్పడుతున్నారని ధ్వజమెత్తారు.
-
ప్రతిపక్షాల కుట్రల్లో పావులు: రేవంత్ రెడ్డి నాయకత్వంలో లక్షలాది మంది కార్యకర్తలు శ్రమించి పార్టీని అధికారంలోకి తెస్తే.. కొండా కుటుంబం మాత్రం తాము కూర్చున్న కొమ్మను తామే నరుక్కుంటున్నట్లు వ్యవహరిస్తోందని, విపక్షాలకు లాభం చేకూర్చేలా మాట్లాడుతోందని ఎమ్మెల్యేలు ఆరోపించారు.
అధిష్ఠానానికి సీఎల్పీ తీర్మానం..
సీఎం రేవంత్ రెడ్డి నాయకత్వానికి పార్టీ శాసనసభాపక్షం సంపూర్ణ మద్దతుగా నిలుస్తుందని స్పష్టం చేసిన నేతలు.. పార్టీ లైన్ దాటి మాట్లాడే ఎంతటి నాయకులపైనైనా కఠిన చర్యలు తీసుకోవాలని కోరారు:
-
తీర్మానం సమర్పణ: కొండా సురేఖను క్యాబినెట్ నుంచి తప్పించాలని, పార్టీ నుంచి బహిష్కరించాలని కోరుతూ రూపొందించిన ప్రత్యేక తీర్మానాన్ని ఏఐసీసీ, పీసీసీ క్రమశిక్షణ కమిటీకి అందజేయనున్నట్లు తెలిపారు.
-
ఇతర నేతలపైనా విచారణ: కొండా కుటుంబంతో పాటు ఇటీవల వివాదాస్పద వ్యాఖ్యలు చేసిన సీనియర్ నేతలపై కూడా క్రమశిక్షణా చర్యలు ఉండాలని నాయకులు కోరారు.
ఈ సమావేశంలో ఎమ్మెల్యేలు రేవూరి ప్రకాష్ రెడ్డి, దొంతి మాధవరెడ్డి, కేఆర్ నాగరాజు, మధుసూదన్ రెడ్డి, మందుల సామెల్, కూచుకుళ్ల రాజేష్ రెడ్డి, కుంభం అనిల్ కుమార్ రెడ్డి, ఎమ్మెల్సీ బస్వరాజు సారయ్య తదితరులు పాల్గొన్నారు.