Chandrababu: కేంద్ర హోంమంత్రి అమిత్షా అధ్యక్షతన తమిళనాడులోని మహాబలిపురం (మామల్లపురం) వేదికగా జరిగిన దక్షిణ మండల మండలి (Southern Zonal Council) సమావేశంలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు పాల్గొన్నారు. దక్షిణాది రాష్ట్రాల మధ్య సమన్వయం, కేంద్ర-రాష్ట్రాల భాగస్వామ్యం, ప్రాంతీయ అభివృద్ధిని వేగవంతం చేసే దిశగా పలు కీలక ప్రతిపాదనలను ఆయన సభ ముందుంచారు.
ఈ సమావేశంలో దక్షిణాది రాష్ట్రాల ముఖ్యమంత్రులు, ఉప ముఖ్యమంత్రులు, కేంద్ర మంత్రులు పాల్గొని నీట్ వివాదం, కావేరి జలాలు, భవిష్యత్ నియోజకవర్గాల పునర్విభజన వంటి కీలక అంశాలపై చర్చించారు.
అమరావతి – బెంగళూరు – చెన్నై బుల్లెట్ రైలు కారిడార్..
దక్షిణాది ఆర్థికాభివృద్ధికి రవాణా వ్యవస్థల అనుసంధానం అత్యంత కీలకమని చంద్రబాబు పేర్కొన్నారు..
-
కుప్పం మీదుగా బుల్లెట్ ట్రైన్: ఆంధ్రప్రదేశ్, కర్ణాటక, తమిళనాడు రాష్ట్రాలను అనుసంధానిస్తూ హై-స్పీడ్ బుల్లెట్ ట్రైన్ కారిడార్ను ఏర్పాటు చేయాలని ప్రతిపాదించారు. ఈ మార్గాన్ని కుప్పం మీదుగా నిర్మిస్తే మూడు రాష్ట్రాల ప్రజలకు, వాణిజ్య రంగానికి ఎంతో మేలు జరుగుతుందని వివరించారు.
-
మెట్రో ప్రాజెక్టులకు అనుమతులు: విశాఖపట్నం మరియు విజయవాడ మెట్రో రైలు ప్రాజెక్టుల నిర్మాణానికి కేంద్ర ప్రభుత్వం త్వరితగతిన అనుమతులు మంజూరు చేయాలని కోరారు.
-
సౌత్ కోస్ట్ రైల్వే జోన్ & పోలవరం: విభజన చట్టంలోని హామీలైన విశాఖ కేంద్రంగా సౌత్ కోస్ట్ రైల్వే జోన్ ఏర్పాటు, పోలవరం ప్రాజెక్టు పనుల పూర్తికి కేంద్రం పూర్తిస్థాయి సహాయ సహకారాలు అందించాలని విజ్ఞప్తి చేశారు.
నదీజలాల అనుసంధానం – ఆధ్యాత్మిక సర్క్యూట్..
దక్షిణాదిలో నీటి కొరతను అధిగమించడానికి మరియు పర్యాటక రంగాన్ని ప్రోత్సహించడానికి సీఎం పలు సూచనలు చేశారు..
-
గోదావరి – కావేరి అనుసంధానం: నదీజలాల వినియోగంలో దక్షిణాది రాష్ట్రాలన్నీ పరస్పర సమన్వయంతో వ్యవహరించాలని పిలుపునిచ్చారు. గోదావరి-కావేరి నదుల అనుసంధానం ద్వారా తమిళనాడు ఎదుర్కొంటున్న తీవ్ర నీటి సమస్యకు శాశ్వత పరిష్కారం లభిస్తుందని స్పష్టం చేశారు. దీర్ఘకాలికంగా గంగా-కావేరి అనుసంధానానికి ఒక స్పష్టమైన జాతీయ ప్రణాళిక అవసరమని అభిప్రాయపడ్డారు.
-
ఆధ్యాత్మిక టూరిజం సర్క్యూట్: దక్షిణ భారతదేశంలోని ప్రముఖ పుణ్యక్షేత్రమైన తిరుపతి నుంచి ఉత్తరాదిలోని కాశీ, అయోధ్య, చార్ధామ్ క్షేత్రాలను కలుపుతూ ప్రత్యేకమైన ఆధ్యాత్మిక కారిడార్ను అభివృద్ధి చేయాలని కేంద్రానికి సూచించారు.
-
కాలపరిమితితో అనుమతులు: ప్రాజెక్టుల డీపీఆర్లు (Detailed Project Reports), పర్యావరణ క్లియరెన్సులను నిర్ణీత గడువులోగా పూర్తి చేసి అమలు చేయాలని కోరారు.
దక్షిణాది రాష్ట్రాల ఉమ్మడి ప్రయోజనాలు కాపాడటంతో పాటు, విభజన సమస్యలను వేగంగా పరిష్కరించుకోవడానికి ఇలాంటి వేదికలు ఎంతగానో దోహదపడతాయని చంద్రబాబు నాయుడు పేర్కొన్నారు.