Cannabis Bust: హైదరాబాద్ నగరంలో మత్తు పదార్థాల విక్రయాలను అరికట్టేందుకు రంగంలోకి దిగిన ‘తెలంగాణ ఈగల్ ఫోర్స్’ (Telangana EAGLE Force) పోలీసులకు తీవ్ర అనుభవం ఎదురైంది. బాలానగర్లో ఒక ఇంటిని స్థావరంగా చేసుకుని డ్రగ్స్ విక్రయిస్తున్న ముఠాను పట్టుకోవడానికి వెళ్లిన పోలీసులపై నిందితులు విశ్వరూపం చూపించారు. పెంపుడు కుక్కను పోలీసులపైకి ఉసిగొల్పి కరిపించడమే కాకుండా.. ఇన్స్పెక్టర్పై స్క్రూడ్రైవర్తో విచక్షణారహితంగా దాడికి పాల్పడ్డారు.
ఈ అర్ధరాత్రి హైడ్రామా అనంతరం ఈగల్ పోలీసులు ఎట్టకేలకు నలుగురు ప్రధాన నిందితులను అరెస్టు చేశారు. ఈ కేసు వివరాలను ఈగల్ ఎస్పీ గిరిధర్ అబిడ్స్లోని తన కార్యాలయంలో వెల్లడించారు.
క్యాటరింగ్ ముసుగులో ‘డెడ్ డ్రాప్’ దందా!
ఆంధ్రప్రదేశ్ పరిధిలోని పాడేరు ప్రాంతానికి చెందిన బొల్లా దుర్గాప్రసాద్, కమలాకర్, కిరణ్ అనే ముగ్గురు అన్నదమ్ములు కొన్నేళ్ల క్రితం హైదరాబాద్ వచ్చారు. బాలానగర్లోని వినాయక్నగర్ శ్మశానవాటిక సమీపంలో ఒక ఇల్లు అద్దెకు తీసుకున్నారు.
-
క్యాటరింగ్ ముసుగు: బయటకు క్యాటరింగ్ బాయ్స్ను సప్లై చేస్తామని చెబుతూనే.. 2022 నుంచి ఏపీ-ఒడిశా సరిహద్దుల నుంచి భారీగా గంజాయి తెచ్చి విక్రయించడం ప్రారంభించారు.
-
‘డెడ్ డ్రాప్’ పద్ధతి: వాట్సాప్ గ్రూపుల ద్వారా ఆర్డర్లు తీసుకుని.. పాత ఎయిర్పోర్టు రోడ్డు, చెత్తకుప్పలు, పార్క్ చేసిన కార్ల పక్కన గంజాయి పొట్లాలను పడేసేవారు. ఆ లొకేషన్ ఫొటోను కస్టమర్కు పంపి డబ్బులు గుంజేవారు. ప్యాకెట్ తీసుకున్నాకే వీళ్లు అక్కడి నుంచి వెళ్లేవారు.
అర్ధరాత్రి 2 గంటలకు మెరుపు దాడి – రక్తసిక్తమైన దాడి సన్నివేశం!
పక్కా సమాచారంతో ఈగల్ డీఎస్పీలు నర్సింగరావు, రమేశ్ నేతృత్వంలో 40 మంది బలగాలు అర్ధరాత్రి 2 గంటల సమయంలో నిందితుల ఇంటిని చుట్టుముట్టారు..
-
కుక్కతో దాడి: పోలీసులు ఇంట్లోకి ప్రవేశించగానే నిందితులు తమ పెంపుడు కుక్కను పోలీసులపైకి వదిలారు. అది ఒక కానిస్టేబుల్ను తీవ్రంగా కరిచింది.
-
స్క్రూడ్రైవర్తో దాడి: నిందితుడు కిరణ్ అనే వ్యక్తి ఇన్స్పెక్టర్ మల్లేశ్ చేతిపై స్క్రూడ్రైవర్తో పొడిచి పక్క భవనాల పైకి దూకుతూ పారిపోయే ప్రయత్నం చేశాడు.
-
సెల్ఫీ వీడియో బెదిరింపులు: ఓ వృద్ధురాలి ఫోన్ లాక్కుని 3వ అంతస్తుపైకి ఎక్కి “నేను కిందకి దూకేస్తా.. పోలీసులకు ఎంతో మద్యం, డబ్బులు ఇచ్చాను నన్నెలా అరెస్ట్ చేస్తారు?” అంటూ సెల్ఫీ వీడియో తీసి బెదిరించాడు. కిందకు దూకడంతో కాళ్లు విరిగినప్పటికీ పారిపోతుండగా పోలీసులు అతడిని, భార్య హారికను పట్టుకున్నారు.
వీరి ఇంట్లో సోదాలు చేయగా 14.5 కిలోల గంజాయి, ఒక ఎయిర్గన్ లభించాయి. నిందితుల ఫోన్లను తనిఖీ చేయగా 203 మంది వీరికి కస్టమర్లుగా ఉన్నట్లు తేలింది. వంద మందికి పరీక్షలు చేయగా ఏకంగా 72 మందికి డ్రగ్స్ పాజిటివ్ వచ్చింది!
ఖాకీల కుమ్మక్కు – వెలుగులోకి విస్తుపోయే నిజాలు!
ఈ విచారణలో నిందితులతో స్థానిక బాలానగర్ స్టేషన్కు చెందిన కొందరు పోలీసులకు సన్నిహిత సంబంధాలు ఉన్నట్లు వెల్లడైంది.
-
రైడ్ జరగడానికి కొద్దిసేపటి ముందే ఓ కానిస్టేబుల్ నిందితుల ఇంటికి వచ్చి వెళ్లినట్లు తెలిసింది.
-
మంగళవారం రాత్రి నిందితుల ఇంట్లో జరిగిన మద్యం పార్టీలో ఓ ఎస్సై, కానిస్టేబుల్ పాల్గొనడమే కాకుండా.. తమ వైర్లెస్ సెట్ భాగమైన ‘మ్యాన్ప్యాక్’ (Manpack) ను అక్కడే మరచిపోగా ఈగల్ పోలీసులు దాన్ని స్వాధీనం చేసుకున్నారు!
ఎస్సై, కానిస్టేబుళ్లు ప్రైవేట్ పార్టీలకు నిందితుల నుంచి మద్యం, క్యాటరింగ్ ఉచితంగా పొందుతూ తనిఖీల సమాచారాన్ని ముందే చేరవేస్తున్నట్లు అధికారులు గుర్తించారు. ముఠాను అరెస్ట్ చేసిన ఈగల్ పోలీసులు.. లోతుగా దర్యాప్తు జరుపుతున్నారు.