Thalliki Vandanam: ఆంధ్రప్రదేశ్ లోని విద్యార్థుల తల్లిదండ్రులకు కూటమి ప్రభుత్వం ఒక పెద్ద గుడ్ న్యూస్ చెప్పింది. పిల్లల చదువులు కుటుంబాలకు భారం కాకూడదనే ఉద్దేశంతో ప్రవేశపెట్టిన ‘తల్లికి వందనం’ పథకం డబ్బులను విడుదల చేసేందుకు ప్రభుత్వం ముహూర్తం ఖరారు చేసింది. ఒకటో తరగతి నుంచి ఇంటర్మీడియట్ వరకు ప్రభుత్వ మరియు ప్రైవేట్ స్కూళ్లు, కాలేజీల్లో చదువుకునే అర్హులైన ప్రతి విద్యార్థి తల్లి ఖాతాలో ఏటా రూ. 15,000 ఆర్థిక సాయాన్ని ప్రభుత్వం జమ చేస్తుంది. ఈ ఏడాదికి సంబంధించిన ఈ నగదును జులై 15వ తేదీ నుంచి నేరుగా లబ్ధిదారుల బ్యాంక్ ఖాతాల్లో వేయాలని ప్రభుత్వం నిర్ణయించింది.
అయితే, ఈ పథకం కింద డబ్బులు మీ ఖాతాలో పడాలంటే తప్పనిసరిగా కొన్ని పనులు పూర్తి చేయాలని ప్రభుత్వం స్పష్టం చేసింది. లబ్ధిదారులు తమ బ్యాంక్ అకౌంట్తో ఆధార్ నంబర్ను ఖచ్చితంగా లింక్ చేసి ఉంచాలి. దీనితో పాటు బ్యాంక్ ఖాతాకు ఎన్పీసీఐ (NPCI) మ్యాపింగ్ పూర్తి అయి ఉండాలి. గత ఏడాది చాలా మందికి ఈ ఎన్పీసీఐ మ్యాపింగ్ లేకపోవడం వల్లే డబ్బులు రాలేదు. కాబట్టి వెంటనే బ్యాంక్కు వెళ్లి ఈ పని పూర్తి చేసుకోవాలని అధికారులు సూచిస్తున్నారు. అలాగే బ్యాంక్ అకౌంట్ యాక్టివ్గా ఉండేందుకు ఈకేవైసీ (e-KYC) కూడా పూర్తి చేసి ఉండాలి. జులై 15 లోపు ఈ పనులు చేసుకుంటేనే ప్రభుత్వ సొమ్ము డైరెక్ట్ బెనిఫిట్ ట్రాన్స్ఫర్ (DBT) ద్వారా అకౌంట్లలో పడుతుంది.
నిజానికి గత నెలలోనే స్కూళ్లు, కాలేజీలు ప్రారంభమైనప్పటికీ.. లబ్ధిదారుల ఎంపిక, కొన్ని సాంకేతిక కారణాల వల్ల ఈ నిధుల విడుదల కాస్త ఆలస్యమైంది. ఈ నెల 15వ తేదీ నుంచి రాష్ట్రవ్యాప్తంగా ప్రతిష్టాత్మకంగా నిర్వహించబోయే ‘మెగా పేరెంట్-టీచర్ మీటింగ్’ (తల్లిదండ్రులు-ఉపాధ్యాయుల సమావేశం) రోజు నుంచే ఈ పథకం సొమ్మును తల్లుల ఖాతాల్లో జమ చేయనున్నారు. ఇందుకోసం అర్హులైన లబ్ధిదారుల పూర్తి జాబితాను కూడా ప్రభుత్వం ఇప్పటికే సిద్ధం చేసి విడుదల చేసింది.