Weather Report: తెలుగు రాష్ట్రాలలో వాతావరణం ప్రస్తుతం విచిత్రంగా మారుతోంది. ఆకాశంలో దట్టమైన మేఘాలు కమ్ముకుని భారీ వర్షం పడేలా కనిపిస్తున్నప్పటికీ, కేవలం చిరుజల్లులు కురిసి మబ్బులు మాయమైపోతున్నాయి. ఈ నేపథ్యంలో ఆంధ్రప్రదేశ్, తెలంగాణ రాష్ట్రాలలో రాబోయే రోజుల్లో వాతావరణం ఎలా ఉండబోతుందనే దానిపై వాతావరణ శాఖ ఒక కీలక అప్డేట్ ఇచ్చింది. అల్పపీడనం, నైరుతి రుతుపవనాల కదలికల వల్ల రెండు రాష్ట్రాలలోనూ వర్షాలు పడే అవకాశం ఉందని అధికారులు తెలిపారు.
మధ్యప్రదేశ్ పరిసర ప్రాంతాల్లో ఏర్పడిన తీవ్ర అల్పపీడనం ప్రస్తుతం ఉత్తర ప్రదేశ్ వైపు కదులుతోంది. ఈ వాతావరణ వ్యవస్థ తెలంగాణ రాష్ట్రానికి చాలా దూరంగా వెళ్లిపోవడం వల్ల, దీని ప్రభావం మన వాతావరణంపై పెద్దగా ఉండదని హైదరాబాద్ వాతావరణ కేంద్రం స్పష్టం చేసింది. అయితే, రుతుపవనాలు దేశమంతటా వేగంగా ముందుకు సాగడానికి పరిస్థితులు అనుకూలంగా ఉన్నాయని అధికారులు వెల్లడించారు.
ఈ మార్పుల వల్ల రాబోయే మూడు రోజుల పాటు (జులై 8, 9, 10 తేదీల్లో) తెలంగాణ రాష్ట్రంలో అక్కడక్కడ తేలికపాటి నుండి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. వర్షాలతో పాటు రాగల మూడు రోజుల్లో తెలంగాణ వ్యాప్తంగా గంటకు 50 నుండి 60 కిలోమీటర్ల వేగంతో బలమైన ఈదురు గాలులు (ఉపరితల గాలులు) వీచే ప్రమాదం ఉందని వాతావరణ శాఖ హెచ్చరించింది.
మరోవైపు, ఆంధ్రప్రదేశ్ రాష్ట్రంలో కూడా రాబోయే ఐదు రోజుల పాటు వర్షాలు కురుస్తాయని వాతావరణ శాఖ అంచనా వేసింది. నైరుతి దిశ నుంచి వీస్తున్న గాలుల ప్రభావం వల్ల ఏపీలోని పలు ప్రాంతాలలో ఉరుములు, మెరుపులతో పాటు ఈదురు గాలులతో కూడిన వర్షాలు పడే అవకాశం ఉందని, ప్రజలు అప్రమత్తంగా ఉండాలని అధికారులు సూచించారు.