Boda Janardhan: ఉమ్మడి ఆదిలాబాద్ జిల్లా రాజకీయాల్లో కీలక నేత, మాజీ మంత్రి బోడ జనార్దన్ త్వరలోనే తెలంగాణ రక్షణ సేన (TRS) పార్టీలో చేరనున్నారు. శుక్రవారం హైదరాబాద్లోని బంజారాహిల్స్ పార్టీ కార్యాలయంలో ఆ పార్టీ అధ్యక్షురాలు కల్వకుంట్ల కవితతో ఆయన ప్రత్యేకంగా సమావేశమయ్యారు. ఈ సందర్భంగా రాష్ట్రంలోని తాజా రాజకీయ పరిణామాలు, పార్టీని ఏ విధంగా బలోపేతం చేయాలనే అంశాలపై వీరిద్దరూ చర్చించారు. త్వరలోనే తన అనుచరులతో కలిసి అధికారికంగా పార్టీ కండువా కప్పుకోనున్నట్లు జనార్దన్ ప్రకటించారు.
బోడ జనార్దన్ ఉమ్మడి ఆంధ్రప్రదేశ్ రాజకీయాల్లో సీనియర్ నాయకుడిగా గుర్తింపు పొందారు. మంచిర్యాల జిల్లా చెన్నూరు నియోజకవర్గం నుండి తెలుగుదేశం పార్టీ తరపున వరుసగా నాలుగు సార్లు ఎమ్మెల్యేగా గెలిచి రికార్డు సృష్టించారు. గతంలో ఎన్టీ రామారావు ముఖ్యమంత్రిగా ఉన్న సమయంలో ఆయన మంత్రివర్గంలో కార్మిక శాఖ మంత్రిగా కూడా బాధ్యతలు నిర్వహించారు. ఆయనకు ఉన్న సుదీర్ఘ రాజకీయ అనుభవం పార్టీకి పెద్ద ప్లస్ అవుతుందని భావిస్తున్నారు.
ముఖ్యంగా సింగరేణి బొగ్గు గనుల ప్రాంతంలో పార్టీని బలోపేతం చేయడంపై బోడ జనార్దన్ దృష్టి సారించనున్నారు. గతంలో కార్మిక మంత్రిగా పనిచేసిన అనుభవం ఉండటంతో, కార్మికుల సమస్యలపై ఆయనకు పూర్తి అవగాహన ఉంది. ఈ నేపథ్యం సింగరేణి బెల్ట్లోని కార్మికులను పార్టీ వైపు తిప్పుకోవడానికి ఉపయోగపడుతుందని ఆయన నమ్ముతున్నారు. కల్వకుంట్ల కవిత నాయకత్వంలో ప్రజల సమస్యలపై పోరాడేందుకు తాను సిద్ధంగా ఉన్నానని ఆయన ఈ సందర్భంగా స్పష్టం చేశారు.
జనార్దన్ వంటి సీనియర్ నాయకుడు పార్టీలోకి రావడం పట్ల కల్వకుంట్ల కవిత సంతోషం వ్యక్తం చేశారు. అనుభవం ఉన్న నాయకుల సలహాలు పార్టీ ఎదుగుదలకు ఎంతో అవసరమని ఆమె పేర్కొన్నారు. ఉమ్మడి ఆదిలాబాద్ జిల్లాలో పార్టీ కేడర్ను ఏకం చేస్తూ ముందుకు సాగాలని ఆమె ఆయనకు సూచించారు. దశాబ్దాల రాజకీయ చరిత్ర ఉన్న బోడ జనార్దన్ రాకతో తెలంగాణ రక్షణ సేనలో కొత్త ఉత్సాహం నెలకొందని రాజకీయ విశ్లేషకులు అభిప్రాయపడుతున్నారు.