Therachaapa Movie Review: అనన్య క్రియేషన్స్ బ్యానర్పై కైలాష్ దుర్గం నిర్మించిన తాజా చిత్రం ‘తెరచాప’. జోయెల్ జార్జ్ దర్శకత్వంలో వచ్చిన ఈ సినిమా, ఇప్పటికే విడుదలైన ప్రమోషన్లతో మంచి బజ్ను క్రియేట్ చేసింది. నవీన్ రాజ్ శంకరపు, పూజా సుహాసిని, శ్రీలు ప్రధాన పాత్రల్లో నటించిన ఈ చిత్రం ఈరోజే (ఏప్రిల్ 17) ప్రేక్షకుల ముందుకు వచ్చింది. గ్రామీణ నేపథ్యంలో సాగే ఈ యాక్షన్ డ్రామా ఎలా ఉందో ఇప్పుడు చూద్దాం.
కథేంటంటే..
సముద్ర తీర ప్రాంతంలోని ఒక పల్లెటూరి నేపథ్యంలో ఈ సినిమా సాగుతుంది. ఆ ఊరి ప్రజల కష్టసుఖాల్లో తోడుండే పెద్దమనిషి కాశీ బాబు (నాగ మహేష్) అనుమానాస్పద స్థితిలో మరణిస్తాడు. ఊరి వాళ్లంతా అది సాధారణ మరణమే అని భావించినా, అతని కొడుకు ఈశ్వర్ (నవీన్ రాజ్) మాత్రం తన తండ్రి మరణం వెనుక ఏదో కుట్ర ఉందని నమ్ముతాడు. తన తండ్రి మృతికి గల అసలు కారణాన్ని వెలికి తీసే క్రమంలో ఈశ్వర్కు ఎదురైన సవాళ్లు ఏంటి? ఈ ప్రయాణంలో గాయత్రి (పూజా సుహాసిని), సీత (శ్రీలు) పాత్రల ప్రాముఖ్యత ఏమిటి? అసలు ఆనంద్ రాజు (రాజీవ్ కనకాల) పాత్ర కథను ఎలాంటి మలుపు తిప్పింది అనేది మిగిలిన కథ.
ఎవరెలా చేశారంటే..
ఈ సినిమాలో హీరోగా నటించిన నవీన్ రాజ్ ఒక మత్స్యకార యువకుడి పాత్రలో చాలా సహజంగా ఒదిగిపోయాడు. గెటప్ పరంగానే కాకుండా, నటనలోనూ మంచి పరిణితి చూపించాడు. ఇక హీరోయిన్లు పూజా సుహాసిని, శ్రీలు తమ నటనతో ఆకట్టుకున్నారు. పూజా సాంప్రదాయబద్ధమైన పాత్రలో హుందాగా కనిపిస్తే, శ్రీలు మాస్ లుక్లో ఎమోషన్స్ను పండించి మెప్పించింది. రాజీవ్ కనకాల, నాగ మహేష్ తమ అనుభవంతో సినిమాకు బలాన్ని ఇచ్చారు. ముఖ్యంగా ‘పుష్ప’ ఫేమ్ జగదీష్ ప్రతాప్ బండారి పాత్ర ఊహించని విధంగా ఉండి ప్రేక్షకులను ఆశ్చర్యపరుస్తుంది. విలన్గా నటించిన భూపతి కూడా హీరోకు గట్టి పోటీనిచ్చారు.
సాంకేతిక విభాగం..
దర్శకుడు జోయెల్ జార్జ్ ఒక సాధారణ గ్రామీణ కథకు ఎమోషన్స్ జోడించి తెరకెక్కించడంలో సఫలమయ్యాడు. ప్రజల్ కృష్ణ అందించిన పాటలు, ఎంఎల్ రాజా బ్యాక్గ్రౌండ్ మ్యూజిక్ సినిమా మూడ్ను బాగా ఎలివేట్ చేశాయి. సినిమాటోగ్రఫీ విజువల్స్ పల్లెటూరి వాతావరణాన్ని కళ్లకు కట్టినట్లు చూపించాయి. నిర్మాణ విలువలు సినిమా బడ్జెట్కు తగ్గట్లుగా చాలా బాగున్నాయి. అయితే అక్కడక్కడా కథనం కొంచెం నెమ్మదించినట్లు అనిపించినా, క్లైమాక్స్ వైపు వెళ్లేకొద్దీ ఆసక్తి పెరుగుతుంది.
చివరిగా..
తండ్రీకొడుకుల సెంటిమెంట్, పల్లెటూరి పాలిటిక్స్ మరియు సస్పెన్స్ కలగలిసిన చిత్రమే ‘తెరచాప’. కొన్ని రొటీన్ సన్నివేశాలు ఉన్నప్పటికీ, నటీనటుల ప్రతిభ మరియు భావోద్వేగాల కోసం ఈ సినిమాను ఒకసారి చూడొచ్చు. ముఖ్యంగా గ్రామీణ నేపథ్యం ఉన్న సినిమాలను ఇష్టపడే వారికి ఈ ‘తెరచాప’ మంచి అనుభూతిని ఇస్తుంది.
రేటింగ్: 3/5