Telangana: తెలంగాణ రాష్ట్రంలో మావోయిస్టుల ప్రాబల్యం క్రమంగా తగ్గుముఖం పడుతోంది. తాజాగా శుక్రవారం నాడు భారీ సంఖ్యలో మావోయిస్టులు పోలీసుల ముందు లొంగిపోయారు. రాష్ట్ర డీజీపీ శివధర్రెడ్డి సమక్షంలో మొత్తం 42 మంది మావోయిస్టులు తమ ఆయుధాలను వదిలిపెట్టి జనజీవన స్రవంతిలోకి వచ్చారు. లొంగిపోయిన వారిలో బెటాలియన్ డిప్యూటీ కమాండర్ స్థాయి వ్యక్తి అయిన కేశాలు కూడా ఉండటం గమనార్హం. గత ఏడాదిన్నర కాలంలోనే సుమారు 763 మంది మావోయిస్టులు పోలీసులకు లొంగిపోయారని డీజీపీ ఈ సందర్భంగా వెల్లడించారు.
ముఖ్యంగా ఛత్తీస్గఢ్ అడవుల్లో పోలీసులు గాలింపు చర్యలు తీవ్రతరం చేయడంతో, ప్రాణ భయంతో మావోయిస్టులు తెలంగాణ పోలీసులను ఆశ్రయిస్తున్నారు. ఇప్పుడు లొంగిపోయిన 42 మందిలో ఒక్కరు మాత్రమే తెలంగాణ ప్రాంతానికి చెందిన వారు కాగా, మిగిలిన వారందరూ ఛత్తీస్గఢ్ రాష్ట్రానికి చెందినవారేనని పోలీసులు తెలిపారు. హింసను వదిలిపెట్టి శాంతియుత మార్గంలో బతకాలని కోరుకునే వారికి ప్రభుత్వం అండగా ఉంటుందని డీజీపీ భరోసా ఇచ్చారు.
లొంగిపోయిన మావోయిస్టుల కోసం ప్రభుత్వం భారీ పునరావాస ప్యాకేజీని ప్రకటించింది. వీరికి సుమారు రూ. 1.93 కోట్ల నగదుతో పాటు, ముఖ్యమంత్రి ఆదేశాల మేరకు ప్రత్యేకంగా ఆరోగ్య కార్డులను కూడా అందజేయనున్నారు. గతంలో మావోయిస్టు కమిటీల్లో తెలంగాణ వారు ఎక్కువగా ఉండేవారని, కానీ ఇప్పుడు ఆ సంఖ్య గణనీయంగా తగ్గిందని డీజీపీ వివరించారు. సెంట్రల్ కమిటీలో గతంలో 11 మంది ఉంటే ఇప్పుడు ఇద్దరే మిగిలారని, స్టేట్ కమిటీలో కూడా 24 మందికి గానూ ఇద్దరే ఉన్నారని ఆయన పేర్కొన్నారు. అడవుల్లో ఉన్న మిగిలిన వారు కూడా ఆయుధాలు వీడి లొంగిపోవాలని ఆయన పిలుపునిచ్చారు.