Weather Alert: ప్రస్తుతం తెలుగు రాష్ట్రాల్లో వాతావరణం చాలా వింతగా మారుతోంది. ఉదయం నుంచి సాయంత్రం వరకు భానుడు తన ప్రతాపాన్ని చూపిస్తుంటే, సాయంత్రం అయ్యేసరికి ఒక్కసారిగా వాతావరణం చల్లబడి వర్షాలు కురుస్తున్నాయి. మరికొన్ని చోట్ల బలమైన ఈదురుగాలులతో కూడిన వానలు పడుతున్నాయి. ఈ నేపథ్యంలో రాబోయే మూడు రోజుల పాటు ఆంధ్రప్రదేశ్, తెలంగాణ రాష్ట్రాల్లో వాతావరణం ఎలా ఉండబోతుందో వాతావరణ శాఖ కీలక సమాచారాన్ని అందించింది.
ఆంధ్రప్రదేశ్ విషయానికి వస్తే, అమరావతి వాతావరణ కేంద్రం సమాచారం ప్రకారం రాష్ట్రంలోని పలు ప్రాంతాల్లో తేలికపాటి నుండి మోస్తరు వర్షాలు కురిసే అవకాశం ఉంది. ముఖ్యంగా ఉత్తర కోస్తా ఆంధ్ర, యానాం ప్రాంతాల్లో మంగళ, బుధ, గురువారాల్లో ఉరుములు, మెరుపులతో కూడిన జల్లులు పడవచ్చు. ఈ సమయంలో గంటకు 30 నుండి 40 కిలోమీటర్ల వేగంతో ఈదురుగాలులు వీచే అవకాశం ఉంది. దక్షిణ కోస్తా మరియు రాయలసీమ ప్రాంతాల్లో మంగళవారం మాత్రమే వర్ష సూచన ఉంది, ఆ తర్వాత బుధ, గురువారాల్లో వాతావరణం పొడిగా ఉంటుందని అధికారులు తెలిపారు.
తెలంగాణలో కూడా ఇదే తరహా పరిస్థితులు కనిపిస్తున్నాయి. హైదరాబాద్ వాతావరణ కేంద్రం తెలిపిన వివరాల ప్రకారం, రానున్న మూడు రోజుల పాటు రాష్ట్రంలోని పలు జిల్లాల్లో వర్షాలు కురిసే అవకాశం ఉంది. మంగళ, బుధవారాల్లో కొన్ని చోట్ల ఉరుములు, మెరుపులతో పాటు గంటకు 40 నుండి 50 కిలోమీటర్ల వేగంతో ఈదురుగాలులు వీస్తాయని, అక్కడక్కడ వడగళ్ల వానలు కూడా పడవచ్చని హెచ్చరించారు. గురువారం నాడు కూడా కొన్ని జిల్లాల్లో తేలికపాటి వర్షాలు కురిసే అవకాశం ఉందని వెల్లడించారు.
ఇక ఉష్ణోగ్రతల విషయానికి వస్తే, వర్షాలు పడుతున్నప్పటికీ ఎండల తీవ్రత పెద్దగా తగ్గడం లేదు. రాయలసీమలో రాబోయే మూడు రోజుల్లో గరిష్ట ఉష్ణోగ్రతలు 40 డిగ్రీల సెల్సియస్ కంటే ఎక్కువగా నమోదయ్యే అవకాశం ఉందని అధికారులు హెచ్చరించారు. కోస్తా ఆంధ్ర మరియు తెలంగాణలో కూడా ఉష్ణోగ్రతలు ప్రస్తుత స్థాయిలోనే కొనసాగుతాయని, పెద్దగా మార్పు ఉండదని వాతావరణ శాఖ స్పష్టం చేసింది. కాబట్టి ప్రజలు ఎండల పట్ల జాగ్రత్తగా ఉండటంతో పాటు, అకస్మాత్తుగా వచ్చే వర్షాలు, పిడుగుల సమయంలో అప్రమత్తంగా ఉండాలని సూచించారు.