WHO: అంతర్జాతీయ ఆరోగ్య రంగంలో పెను సంచలనం సృష్టిస్తూ, ప్రపంచ ఆరోగ్య సంస్థ (WHO) నుండి అమెరికా అధికారికంగా వేరుపడింది. గత 78 ఏళ్లుగా కొనసాగుతున్న సభ్యత్వానికి స్వస్తి పలుకుతూ ట్రంప్ ప్రభుత్వం తీసుకున్న ఈ నిర్ణయం ఇప్పుడు ప్రపంచవ్యాప్తంగా చర్చకు దారితీసింది. ముఖ్యంగా కరోనా మహమ్మారి వ్యాప్తి సమయంలో ఈ సంస్థ సక్రమంగా స్పందించలేదని, కొన్ని దేశాల రాజకీయ ఒత్తిళ్లకు తలొగ్గి స్వతంత్రంగా పనిచేయడంలో విఫలమైందని అమెరికా గట్టిగా వాదించింది. ఈ మేరకు అమెరికా ఆరోగ్య శాఖ మంత్రి రాబర్ట్ ఎఫ్. కెనడీ జూనియర్, విదేశాంగ మంత్రి మార్కో రూబియోలు సంయుక్తంగా ఒక ప్రకటన విడుదల చేస్తూ, అమెరికా ప్రయోజనాలకు విరుద్ధంగా ఉన్నందునే ఈ నిర్ణయం తీసుకున్నట్లు స్పష్టం చేశారు.
డొనాల్డ్ ట్రంప్ రెండోసారి బాధ్యతలు చేపట్టిన తొలి రోజునే ఈ ప్రక్రియకు శ్రీకారం చుట్టారు. కేవలం ఆరోగ్య సంస్థే కాకుండా, గడిచిన ఏడాది కాలంలో సుమారు 70 అంతర్జాతీయ ఒప్పందాలు, సంస్థల నుండి అమెరికా వైదొలగడం గమనార్హం. డబ్ల్యూహెచ్వో ప్రాథమిక లక్ష్యాల నుంచి దారి తప్పిందని, దీనివల్ల అమెరికా ప్రజలు తీవ్రంగా నష్టపోయారని ప్రభుత్వం ఆరోపించింది. ఇకపై కేవలం అత్యంత పరిమితమైన పరిధిలో మాత్రమే ఈ సంస్థతో కలిసి పనిచేస్తామని అధికారులు వెల్లడించారు.
Also Read: KTR: ట్యాపింగ్ డ్రామా అంతా రాజకీయ కక్షే: కేటీఆర్
అయితే ఈ నిర్ణయంపై ప్రపంచవ్యాప్తంగా నిపుణులు ఆందోళన వ్యక్తం చేస్తున్నారు. అమెరికా వంటి అగ్రరాజ్యం తప్పుకోవడం వల్ల భవిష్యత్తులో కొత్త వ్యాధులను గుర్తించడం, ఇతర దేశాల నుంచి ఆరోగ్య సమాచారాన్ని (Health Data) సేకరించడం కష్టమవుతుందని వారు హెచ్చరిస్తున్నారు. దీనివల్ల అమెరికాకు చెందిన ఔషధ కంపెనీలు, శాస్త్రవేత్తలు కొత్త టీకాలు, మందుల తయారీలో వెనుకబడే అవకాశం ఉందని విశ్లేషకులు అభిప్రాయపడుతున్నారు. మరోవైపు అమెరికా ఇంకా ఈ సంస్థకు సుమారు 130 మిలియన్ డాలర్లకు పైగా బకాయిలు చెల్లించాల్సి ఉందని సమాచారం.