T20 World Cup: 2026లో జరగనున్న టీ20 ప్రపంచకప్కు భారత్, శ్రీలంక సంయుక్తంగా ఆతిథ్యం ఇస్తున్న సంగతి తెలిసిందే. అయితే ఈ మెగా టోర్నీలో బంగ్లాదేశ్ జట్టు పాల్గొనడంపై ఇప్పుడు నీలి నీడలు కమ్ముకున్నాయి. భద్రతా కారణాలను సాకుగా చూపుతూ భారత్లో మ్యాచ్లు ఆడటానికి బంగ్లాదేశ్ క్రికెట్ బోర్డు (BCB) ససేమిరా అంటోంది. దీంతో ఐసీసీ వేదికగా జరుగుతున్న ఈ వివాదం ఇప్పుడు క్రికెట్ వర్గాల్లో హాట్ టాపిక్గా మారింది.
వివాదానికి కారణం ఏంటి?
బంగ్లాదేశ్ స్టార్ బౌలర్ ముస్తాఫిజుర్ రెహ్మన్ను ఐపీఎల్ జట్టు కేకేఆర్ నుంచి తొలగించడంతో ఈ వివాదం మొదలైంది. దీనికి తోడు బంగ్లాదేశ్లో జరుగుతున్న అంతర్గత పరిణామాలు, భారత్తో నెలకొన్న ఉద్రిక్తతల నేపథ్యంలో.. తమ ఆటగాళ్లకు భారత్లో రక్షణ ఉండదని బంగ్లా బోర్డు వాదిస్తోంది. షెడ్యూల్ ప్రకారం బంగ్లాదేశ్ తన మ్యాచ్లను ముంబై, కోల్కతాలో ఆడాల్సి ఉంది. కానీ, తాము భారత్ రాబోమని, తమ మ్యాచ్లను శ్రీలంకకు మార్చాలని వారు ఐసీసీని కోరుతున్నారు.
ఇది కూడా చదవండి: Medaram Jatara 2026: భక్తుల కోసం ఆర్టీసీ భారీ ఏర్పాట్లు.. ఇంటికే అమ్మవారి ప్రసాదం!
బంగ్లాదేశ్ వేసిన ‘గ్రూప్ మార్పిడి’ ప్లాన్
భారత్ రాకుండా తప్పించుకోవడానికి బంగ్లాదేశ్ ఒక వింత ప్రతిపాదనను ఐసీసీ ముందు ఉంచింది. గ్రూప్-సిలో ఉన్న తాము, గ్రూప్-బిలో ఉన్న ఐర్లాండ్తో అదృశ్యం కావాలని (గ్రూప్ స్వాపింగ్) కోరింది. ఐర్లాండ్ జట్టు తన గ్రూప్ మ్యాచ్లను శ్రీలంకలో ఆడాల్సి ఉంది. ఒకవేళ గ్రూపులు మారితే, బంగ్లాదేశ్ తన మ్యాచ్లను శ్రీలంకలో ఆడుకోవచ్చని వారి ప్లాన్.
ఐర్లాండ్ గట్టి షాక్
బంగ్లాదేశ్ చేసిన ఈ ప్రతిపాదనను ఐర్లాండ్ క్రికెట్ బోర్డు నిర్మొహమాటంగా తిరస్కరించింది. తాము ముందుగా నిర్ణయించిన షెడ్యూల్ ప్రకారమే ఆడతామని, తమ మ్యాచ్లన్నీ శ్రీలంకలోనే జరుగుతాయని ఐర్లాండ్ స్పష్టం చేసింది. గ్రూపులు మార్చే ఉద్దేశం తమకు లేదని తేల్చి చెప్పడంతో బంగ్లాదేశ్ ఆశలు అడియాశలయ్యాయి.
ముందున్న గండం
భారత్లో ఆటగాళ్లకు కట్టుదిట్టమైన భద్రత కల్పిస్తామని ఐసీసీ హామీ ఇస్తున్నా బంగ్లాదేశ్ మాత్రం వెనక్కి తగ్గడం లేదు. ఒకవేళ మొండి పట్టు వీడకుండా బంగ్లాదేశ్ జట్టు భారత్కు రాకపోతే, వారు టోర్నీలో పాయింట్లు కోల్పోయే ప్రమాదం ఉంది. మరి ఐసీసీ ఈ విషయంలో ఎలాంటి కఠిన నిర్ణయం తీసుకుంటుందో వేచి చూడాలి.