Hyderabad: సంక్రాంతి పండుగ అంటేనే ఆనందం, కేరింతలు, పతంగుల సందడి. కానీ కొందరు వాడే ప్రమాదకరమైన ‘చైనా మాంజా’ ఇప్పుడు ఆ సంతోషాన్ని చిన్నాభిన్నం చేస్తోంది. తాజాగా సంగారెడ్డి జిల్లా ఫసల్వాదిలో జరిగిన ఘోరం అందరినీ కలచివేస్తోంది. బీహార్కు చెందిన అద్వైక్ అనే యువకుడు బైక్పై వెళ్తుండగా, గాలిలో తెగి వచ్చిన చైనా మాంజా దారం అతని గొంతుకు చుట్టుకుంది. బైక్ వేగంగా ఉండటంతో ఆ పదునైన దారం గొంతును లోతుగా కోసేసింది. తీవ్ర రక్తస్రావం కావడంతో ఆసుపత్రికి తరలించే లోపే ఆ యువకుడు మృత్యువాత పడ్డాడు. కేవలం ఒక సరదా కోసం వాడే దారం, ఒక నిండు ప్రాణాన్ని బలి తీసుకోవడం అత్యంత విచారకరం.
ఈ ఒక్క రోజే కాదు, గత కొద్ది రోజులుగా తెలుగు రాష్ట్రాల్లో ఇలాంటి ఘటనలు వరుసగా జరుగుతున్నాయి. నిన్న ఉప్పల్లో ఒక పోలీస్ అధికారి (ASI) మెడకు ఈ దారం చుట్టుకుని తీవ్ర గాయం కాగా, అల్మాస్గూడలో నడుచుకుంటూ వెళ్తున్న ఓ వృద్ధురాలి కాలు తెగిపోయింది. గచ్చిబౌలిలో ఒక సాఫ్ట్వేర్ ఉద్యోగి కూడా ఈ మాంజా వల్ల ఆసుపత్రి పాలయ్యారు. పోలీసులు పదేపదే హెచ్చరిస్తున్నా, షాపులపై దాడులు చేస్తున్నా, కొందరు మాత్రం అక్రమంగా ఈ దారాన్ని విక్రయిస్తూనే ఉన్నారు. మరికొందరు తమ పతంగులు తెగకూడదనే స్వార్థంతో ఎదుటివారి ప్రాణాలను ప్రమాదంలో పడేస్తున్నారు.
చైనా మాంజా అనేది దారం కాదు, అదొక మృత్యుపాశం. ఇది నైలాన్ లేదా ప్లాస్టిక్ పదార్థంతో తయారై, గ్లాస్ కోటింగ్తో ఉంటుంది. ఇది పర్యావరణానికి కీడు చేయడమే కాకుండా, పక్షులను, మనుషులను క్షణాల్లో గాయపరుస్తుంది. గాలిలో ఎగిరే పతంగి తెగిపోయినప్పుడు ఆ దారం ఎక్కడో ఒక చోట వేలాడుతూ ఉంటుంది. బైక్పై వెళ్లే వారికి అది అస్సలు కనిపించదు. తీరా దగ్గరకు వచ్చాక అది గొంతుకో, చేతికో చుట్టుకుని ప్రాణాలను హరిస్తుంది. ఒక్కసారి ఆలోచించండి.. మనం జరుపుకునే పండుగ ఒక కుటుంబంలో తీరని శోకాన్ని నింపాలా?
ఇకనైనా మారండి బ్రదర్! పోలీసులు కేసులు పెడతారని కాదు, మన వల్ల ఒక ప్రాణం పోకూడదని నిర్ణయించుకోండి. చైనా మాంజాను అమ్మవద్దు, కొనవద్దు. కేవలం సాధారణ కాటన్ దారాన్ని (మామూలు దారం) మాత్రమే వాడండి. ముఖ్యంగా వాహనదారులు ప్రయాణించేటప్పుడు మెడకు మందపాటి మఫ్లర్ లేదా హెల్మెట్ ధరించడం ద్వారా కొంతవరకు రక్షణ పొందవచ్చు. పండుగ పూట ఇతరుల ప్రాణాలకు ముప్పు తలపెట్టకుండా, బాధ్యతాయుతంగా వేడుకలు జరుపుకుందాం.