Amaravati Avakaya Utsav: ఆంధ్రుల రుచికి చిహ్నం ఆవకాయ.. ఆంధ్రుల ఆత్మీయతకు వేదిక అమరావతి. ఈ రెండింటి కలయికతో విజయవాడలోని పున్నమి ఘాట్ వేదికగా రెండు రోజుల పాటు జరిగిన ‘ఆవకాయ అమరావతి’ ఉత్సవాలు అత్యంత వైభవంగా ముగిశాయి. కృష్ణానది అలల గలగలల మధ్య, సినిమా, సంస్కృతి, మరియు సాహిత్యాల మేళవింపుతో సాగిన ఈ వేడుకలు తెలుగు వారి ఆత్మగౌరవాన్ని, రుచుల వైభవాన్ని ప్రపంచానికి చాటిచెప్పాయి. కేవలం ఒక ఆహార ఉత్సవంలా కాకుండా, మన వారసత్వాన్ని ప్రతిబింబించే 28 ప్రత్యేక ప్రదర్శనలు, సృజనాత్మకతకు పదును పెట్టే 4 వర్క్షాప్లతో పున్నమి ఘాట్ ఒక కళా ప్రాంగణంగా మారిపోయింది.
ఈ ఉత్సవాల ప్రాముఖ్యతను వివరిస్తూ ముఖ్యమంత్రి నారా చంద్రబాబు నాయుడు చేసిన ప్రసంగం అందరినీ ఆలోచింపజేసింది. ప్రపంచంలో ఆహారం అంటే భారదేశమని, అదే భారతదేశంలో ఆహారం అంటే ఆంధ్రప్రదేశ్ గుర్తుకురావాలన్నది తమ ప్రభుత్వ ఆకాంక్ష అని ఆయన స్పష్టం చేశారు. గత కొన్నేళ్లుగా రాష్ట్రంలో పండుగలు, ఉత్సవాల సందడి కరువైన వేళ, మళ్లీ ప్రజల ముఖాల్లో నవ్వులు పూయించేలా ప్రభుత్వం ఇలాంటి భారీ కార్యక్రమాలను నిర్వహిస్తోంది. ఒకప్పుడు దసరా అనగానే మైసూరు లేదా కలకత్తా గుర్తొచ్చేవని, కానీ నేడు దసరా అంటే విజయవాడ కనకదుర్గమ్మ ఉత్సవాలే గుర్తుకు వచ్చేలా అత్యున్నత ప్రమాణాలతో వేడుకలు నిర్వహిస్తున్నామని ముఖ్యమంత్రి గర్వంగా గుర్తుచేశారు.
ఇది కూడా చదవండి: Telangana: ప్రభుత్వ ఉద్యోగులకు కొండంత అండ.. రూ. 1.02 కోట్ల భారీ ప్రమాద బీమా!
సినిమా మరియు సాహిత్య రంగాలకు కృష్ణా జిల్లా పెట్టిన పేరు. భక్త ప్రహ్లాద వంటి తొలి చిత్రాల నుంచి బాహుబలి వంటి అంతర్జాతీయ స్థాయి ప్రయోగాల వరకు తెలుగు చిత్రసీమ ప్రయాణం అనిర్వచనీయమని సీఎం కొనియాడారు. ఎన్టీఆర్, ఏఎన్ఆర్, శోభన్ బాబు వంటి మహానటులు ఈ గడ్డ నుంచే వచ్చి సినిమా రంగానికి దిక్సూచిగా నిలిచారని, నేడు బాలకృష్ణ, పవన్ కళ్యాణ్ వంటి వారు ఆ వైభవాన్ని మరింత ముందుకు తీసుకువెళ్తున్నారని ఆయన ప్రశంసించారు. కేవలం సినిమా మాత్రమే కాదు, సంపద సృష్టిలోనూ, వ్యాపార దార్శనికతలోనూ కృష్ణా జిల్లా ఎప్పుడూ ముందంజలోనే ఉంటుందనడానికి ఈ ఉత్సవాల విజయమే నిదర్శనం.
ముగింపు వేడుకల్లో భాగంగా మంత్రి సత్యకుమార్ యాదవ్, ఎంపీ కేశినేని శివనాథ్ (చిన్ని), జిల్లా కలెక్టర్ డా. జి. లక్ష్మీకళ మరియు ఇతర ప్రముఖులు పాల్గొని కళాకారులను అభినందించారు. కృష్ణమ్మ తీరంలో జరిగిన సంగీత, నృత్య ప్రదర్శనలు ప్రేక్షకులను మంత్రముగ్ధులను చేశాయి. మన వంటకాలు, మన కళలు మన అస్తిత్వానికి ప్రతీకలని, ఇలాంటి వేదికల ద్వారా భావితరాలకు మన సంస్కృతిని అందించవచ్చని ఈ ఉత్సవం నిరూపించింది. ముగింపు వేడుకతో పున్నమి ఘాట్ కళాకాంతులతో నిండిపోవడమే కాకుండా, భవిష్యత్తులో అమరావతిని సాంస్కృతిక రాజధానిగా మార్చేందుకు ఒక బలమైన పునాదిని వేసింది.