Hyderabad: హైదరాబాద్ నగర శివార్లలోని అబ్దుల్లాపూర్మెట్ పరిధిలో ఈరోజు ఒక విషాదకర సంఘటన చోటుచేసుకుంది. బాటసింగారం సమీపంలోని సర్వీస్ రోడ్డుపై రెండు బైకులు ఎదురెదురుగా ఢీకొన్నాయి. ఈ ప్రమాదంలో ఒక ఇంజినీరింగ్ విద్యార్థిని ప్రాణాలు కోల్పోగా, మరో ఇద్దరికి తీవ్ర గాయాలయ్యాయి.
అసలేం జరిగిందంటే? దిల్సుఖ్నగర్కు చెందిన హంసలేఖ (22) అనే విద్యార్థిని, తన స్నేహితురాళ్లతో కలిసి బైక్పై పరీక్ష రాయడానికి వెళ్తోంది. బాటసింగారం దగ్గర సర్వీస్ రోడ్డుపై వెళ్తుండగా, ఎదురుగా వస్తున్న మరో బైక్ వీరిని బలంగా ఢీకొట్టింది. ఈ ధాటికి బైక్ మీద ఉన్న ముగ్గురు అమ్మాయిలు కిందపడిపోయారు. దురదృష్టవశాత్తు, సరిగ్గా అదే సమయంలో పక్క నుంచి వెళ్తున్న ఒక లారీ హంసలేఖపై నుంచి దూసుకెళ్లింది. దీంతో ఆమె అక్కడికక్కడే ప్రాణాలు వదిలింది.
మరో ఇద్దరి పరిస్థితి.. ఈ ప్రమాదంలో గాయపడిన మిగిలిన ఇద్దరు విద్యార్థినుల పరిస్థితి కూడా విషమంగా ఉండటంతో, స్థానికులు వెంటనే వారిని దగ్గరలోని ఆసుపత్రికి తరలించారు. పరీక్ష రాసి భవిష్యత్తును వెతుక్కోవాల్సిన విద్యార్థిని, ఇలా అర్ధాంతరంగా రోడ్డు ప్రమాదంలో మరణించడం ఆ కుటుంబంలో తీరని శోకాన్ని నింపింది. పోలీసులు ఘటన స్థలానికి చేరుకుని కేసు నమోదు చేసి దర్యాప్తు చేస్తున్నారు.