Chandrababu Naidu: ఆంధ్రప్రదేశ్లో జిల్లాల పునర్విభజన ప్రక్రియ తుది దశకు చేరుకుంది. ముఖ్యమంత్రి చంద్రబాబు నాయుడు నేతృత్వంలో జరిగిన కీలక సమీక్షా సమావేశంలో రాష్ట్రంలో జిల్లాల సంఖ్య, సరిహద్దుల మార్పులపై మంత్రులతో సుదీర్ఘంగా చర్చించారు. గతంలో ప్రకటించిన మదనపల్లె, పోలవరం, మార్కాపురం జిల్లాలను కలుపుకుంటే మొత్తం జిల్లాల సంఖ్య 29కి చేరుతుందని అంచనా వేసినప్పటికీ, తాజా మార్పుల వల్ల ఆ సంఖ్యను 28 జిల్లాలకే పరిమితం చేసేలా ప్రభుత్వం ఆలోచిస్తోంది. ప్రజల విజ్ఞప్తులు, పాలనా సౌలభ్యం ఆధారంగా ఈ నిర్ణయాలు తీసుకుంటున్నట్లు తెలుస్తోంది.
ఈ సమీక్షలో ప్రధానంగా కొన్ని ప్రాంతాలను ఒక జిల్లా నుంచి మరొక జిల్లాకు మార్చే అంశాలపై చర్చ జరిగింది. ముఖ్యంగా అన్నమయ్య జిల్లా కేంద్రంగా ఉన్న రాయచోటిని మదనపల్లెలో విలీనం చేయడం, అలాగే రాజంపేటను తిరిగి కడప జిల్లాలో కలిపే ప్రతిపాదనలు తెరపైకి వచ్చాయి. వీటితో పాటు మరికొన్ని ప్రాంతాల అభ్యంతరాలను కూడా ప్రభుత్వం పరిశీలిస్తోంది. స్థానిక ప్రజల అవసరాలకు అనుగుణంగా మార్పులు చేస్తూ, పరిపాలనను ప్రజలకు మరింత దగ్గర చేయడమే లక్ష్యంగా ప్రభుత్వం అడుగులు వేస్తోంది.
జిల్లా సరిహద్దుల విషయంలో కూడా కీలక మార్పులు జరిగే అవకాశం ఉంది. దొనకొండ, కురిచేడు ప్రాంతాలను కొత్తగా ఏర్పడబోయే మార్కాపురం జిల్లాలో చేర్చాలని, అలాగే పొదిలిని ప్రకాశం జిల్లాలోనే ఉంచాలని ప్రభుత్వం భావిస్తోంది. అదేవిధంగా స్థానిక నాయకుల కోరిక మేరకు గూడూరును నెల్లూరు జిల్లాలో, రైల్వే కోడూరును తిరుపతి జిల్లాలో కలిపే అంశంపై కసరత్తు ముమ్మరం చేశారు. ఇలా చేయడం వల్ల భౌగోళికంగా ప్రజలకు ప్రయాణ భారం తగ్గుతుందని ప్రభుత్వం భావిస్తోంది.
ఈ మార్పులపై మంత్రివర్గ ఉపసంఘం ఆదివారం మరోసారి భేటీ అయి తన నివేదికను సిద్ధం చేయనుంది. ఈ నివేదికను సోమవారం జరిగే రాష్ట్ర మంత్రివర్గ సమావేశంలో ప్రవేశపెడతారు. క్యాబినెట్ ఆమోదం పొందిన తర్వాత, ఈ నెల 31వ తేదీన కొత్త జిల్లాలకు సంబంధించిన తుది నోటిఫికేషన్ వెలువడే అవకాశం ఉంది. దీనివల్ల ఏయే ప్రాంతాలు ఏ జిల్లాలోకి వస్తాయనే విషయంపై ప్రజలకు పూర్తి స్పష్టత రానుంది.