Tirumala: కలియుగ దైవం వేంకటేశ్వరస్వామిని దర్శించుకునేందుకు తిరుమల కొండపై భక్తుల రద్దీ విపరీతంగా పెరిగింది. తిరుమలకు చేరుకుంటున్న భక్తుల సంఖ్య క్రమంగా పెరుగుతుండటంతో వైకుంఠం క్యూ కాంప్లెక్స్లోని అన్ని కంపార్ట్మెంట్లు నిండిపోయాయి. భక్తుల క్యూ లైన్లు క్యూ కాంప్లెక్స్ దాటి బయట ఉన్న శిలాతోరణం వరకు కిలోమీటర్ల మేర సాగుతున్నాయి. దీంతో సామాన్య భక్తులు తమ వంతు దర్శనం కోసం గంటల తరబడి వేచి చూడాల్సిన పరిస్థితి ఏర్పడింది.
ముఖ్యంగా ఎలాంటి దర్శన టోకెన్లు లేని భక్తుల పరిస్థితి ఇబ్బందికరంగా మారింది. ప్రస్తుతం ఉన్న రద్దీ దృష్ట్యా, టోకెన్లు లేని భక్తులకు స్వామివారి సర్వదర్శనం లభించడానికి సుమారు 24 గంటల సమయం పడుతోంది. ఎముకలు కొరికే చలిని కూడా లెక్కచేయకుండా భక్తులు క్యూ లైన్లలో నిలబడి ‘గోవింద’ నామస్మరణతో వేచి ఉంటున్నారు. క్యూ లైన్లలో వేచి ఉన్న భక్తులకు టీటీడీ సిబ్బంది ఎప్పటికప్పుడు తాగునీరు, పాలు మరియు ఆహార సౌకర్యాలను కల్పిస్తున్నారు.
తిరుమలకు వస్తున్న భక్తులు ఈ రద్దీని దృష్టిలో ఉంచుకుని తమ ప్రయాణాన్ని ప్లాన్ చేసుకోవాలని అధికారులు సూచిస్తున్నారు. వేచి ఉండే సమయం ఎక్కువగా ఉన్నందున చిన్న పిల్లలు, వృద్ధులతో వచ్చే భక్తులు తగిన జాగ్రత్తలు తీసుకోవాలని కోరుతున్నారు. రద్దీ పెరుగుతున్న కొద్దీ భక్తులకు ఎలాంటి ఇబ్బందులు కలగకుండా దర్శన ప్రక్రియను వేగవంతం చేసేందుకు టీటీడీ అధికారులు అన్ని ఏర్పాట్లు చేస్తున్నారు.