Murder: పహాడీ షరీఫ్ పోలీస్ స్టేషన్ పరిధిలోని షాహీన్ నగర్లో దారుణం చోటుచేసుకుంది. అత్తాపూర్ పోలీస్ స్టేషన్ పరిధికి చెందిన రౌడీ షీటర్, 32 ఏళ్ల అమెర్ను గుర్తు తెలియని వ్యక్తులు అత్యంత కిరాతకంగా హత్య చేశారు.
ఘటన వివరాలు
ఈరోజు షాహీన్ నగర్లో కొందరు గుర్తు తెలియని వ్యక్తులు కత్తులతో వచ్చి అమెర్పై ఒక్కసారిగా దాడికి పాల్పడ్డారు. ఈ ఆకస్మిక దాడిలో తీవ్రంగా గాయపడిన అమెర్ అక్కడికక్కడే మృతి చెందాడు. ఈ సంఘటన స్థానికంగా తీవ్ర భయాందోళనలను సృష్టించింది.
హత్యకు పాత కక్షలే కారణమా?
మృతుడు అమెర్పై అత్తాపూర్ పోలీస్ స్టేషన్లో రౌడీ షీట్ ఉన్నట్లు పోలీసులు గుర్తించారు. అంతేకాకుండా, గతంలో సంచలనం సృష్టించిన ముబారక్ షిగర్ హత్య కేసులో కూడా అమెర్ పాల్గొన్నట్లు సమాచారం. ముఖ్యంగా, 2024 జనవరి 12న జరిగిన ముబారక్ సిగార్ హత్య కేసులో అమెర్ ఏ2 నిందితుడిగా ఉన్నట్లు తెలుస్తోంది. ఈ నేపథ్యంలో, ఈ హత్యకు పాత కక్షలే కారణమై ఉంటాయని పోలీసులు అనుమానిస్తున్నారు.
ఇది కూడా చదవండి: Shehbaz Sharif Trolled: అంతర్జాతీయ వేదికలపై వరుస అవమానాలు, నెట్టింట్లో ఓ రేంజ్లో పాక్ ప్రధానిపై ట్రోలింగ్!
దర్యాప్తు ముమ్మరం
హత్య సమాచారం అందిన వెంటనే పహాడీ షరీఫ్ పోలీసులు హుటాహుటిన సంఘటనా స్థలానికి చేరుకున్నారు. క్లూస్ టీమ్ను కూడా రంగంలోకి దించి, ఆధారాలను సేకరించే పనిని ప్రారంభించారు. మహేశ్వరం ఏసీపీ జానకి రెడ్డి కూడా సంఘటనా స్థలాన్ని పరిశీలించి, కేసు దర్యాప్తు వివరాలను తెలుసుకున్నారు. అనంతరం, మృతదేహాన్ని పోస్టుమార్టం నిమిత్తం ఉస్మానియా మార్చురీకి తరలించారు.
పోలీసులు కేసు నమోదు చేసి, దర్యాప్తు ముమ్మరం చేశారు. నిందితులను పట్టుకునేందుకు ప్రత్యేక బృందాలను ఏర్పాటు చేసి, వారి కోసం గాలిస్తున్నారు.