Bangladesh: బంగ్లాదేశ్లో హిందూ మైనారిటీలపై జరుగుతున్న అమానుష దాడులు, వరుస హత్యల నేపథ్యంలో అక్కడ తీవ్ర ఉద్రిక్త పరిస్థితులు నెలకొన్నాయి. షేక్ హసీనా ప్రభుత్వం పతనం తర్వాత ఏర్పడిన రాజకీయ శూన్యతను ఆసరాగా చేసుకుని, తీవ్రవాద శక్తులు బరితెగిస్తున్న తీరు ఇప్పుడు ప్రపంచవ్యాప్తంగా చర్చనీయాంశంగా మారింది. కేవలం 35 రోజుల వ్యవధిలోనే 11 మంది హిందువులను అత్యంత కిరాతకంగా పొట్టనబెట్టుకోవడం అక్కడి శాంతిభద్రతల క్షీణతకు అద్దం పడుతోంది.
కలచివేస్తున్న కిరాతక పరంపర
డిసెంబర్ 18న మైమెన్సింగ్ జిల్లాలో జరిగిన దీపు చంద్రదాస్ హత్య నాగరిక సమాజాన్ని దిగ్భ్రాంతికి గురిచేసింది. గార్మెంట్ ఫ్యాక్టరీలో పనిచేసే ఈ యువకుడిపై మతపరమైన ఆరోపణలు మోపి, జనం మధ్యలోనే కొట్టి చంపి, మృతదేహాన్ని చెట్టుకు వేలాడదీసి తగలబెట్టడం అక్కడి అరాచకానికి పరాకాష్ట. ఈ క్రమంలోనే జనవరి 5న జెస్సోర్ జిల్లాలో వార్తాపత్రిక ఎడిటర్ రాణా కాంతి బైరాగిని, అలాగే కిరాణా వ్యాపారి మణి చక్రవర్తిని కాల్చి చంపడం హిందూ సమాజంలో భయోత్పాతాన్ని నింపింది.
ఇది కూడా చదవండి: MSVP: MSVP రూ. లక్షా 11 వేలకు తొలి టిక్కెట్ దక్కించుకున్న బీజేపీ నాయకుడు.
వరుసగా జరుగుతున్న దాడుల వివరాలు:
- ప్రంతోష్ కోర్మోకర్: డిసెంబర్ 2న వ్యాపార చర్చల పేరుతో పిలిచి స్కూల్ గ్రౌండ్లో కాల్చి చంపారు.
- ఉత్పోల్ సర్కార్: అదే రోజు ఫరీద్పూర్ జిల్లాలో కళ్లకు గంతలు కట్టి నరికి చంపారు.
- జోగేష్ చంద్రబాయ్ & సుబోర్ణారాయ్: డిసెంబర్ 7న ఇంట్లోనే గొంతుకోసి హతమార్చారు. వీరిలో జోగేష్ 1971 విముక్తి యుద్ధ స్వాతంత్ర్య సమరయోధుడు కావడం గమనార్హం.
- శాంతో చంద్రదాస్: డిసెంబర్ 12న ఆటో డ్రైవర్గా పనిచేసే ఈయనను చంపి మొక్కజొన్న పొలంలో పడేశారు.
- ఖోకోన్ చంద్రదాస్: షరియత్ పూర్ జిల్లాలో ఈయనపై పెట్రోల్ పోసి నిప్పు పెట్టడంతో చికిత్స పొందుతూ జనవరి 3న మరణించారు.
- మరికొందరు: డిసెంబర్ 24న అమృత్ మండల్, 29న బజేంద్ర బిశ్వాస్ వంటి వారు కూడా ఈ మూక హింసకు బలైపోయారు.
ఇది కూడా చదవండి: Hyderabad: 4 వేల కోట్ల స్కాం: ఫాల్కన్ సంస్థ ఎండీ అమర్దీప్ అరెస్ట్
ప్రభుత్వ వైఖరిపై విమర్శలు
ప్రస్తుత మహమ్మద్ యూనస్ నేతృత్వంలోని మధ్యంతర ప్రభుత్వం ఈ ఘటనలను వ్యక్తిగత కక్షలు లేదా దొంగతనాల వల్ల జరిగినవిగా చిత్రీకరించే ప్రయత్నం చేస్తోంది. అయితే, బంగ్లాదేశ్ హిందూ బౌద్ధ క్రైస్తవ ఐక్య పరిషత్ (BHBCUC) వంటి సంస్థలు ఇవి ఉద్దేశపూర్వకంగా మైనారిటీలను లక్ష్యంగా చేసుకుని చేస్తున్న దాడులని స్పష్టం చేస్తున్నాయి. షేక్ హసీనా పాలనలో హిందువులకు లభించిన రక్షణ ఇప్పుడు కరువైందని, రాడికల్ ఇస్లామిస్ట్ శక్తులు అదుపు లేకుండా ప్రవర్తిస్తున్నాయని ఆవేదన వ్యక్తం చేస్తున్నాయి.
అంతర్జాతీయ ఆందోళన
బంగ్లాదేశ్లో ఎన్నికలు సమీపిస్తున్న తరుణంలో ఈ అరాచకాలు పెరగడంపై ఐక్యరాజ్యసమితి మరియు ఇతర మానవ హక్కుల సంస్థలు ఆందోళన వ్యక్తం చేస్తున్నాయి. ముఖ్యంగా భారత విదేశీ వ్యవహారాల శాఖ ఈ హత్యలను తీవ్రంగా ఖండించింది. భద్రత కల్పించాల్సిన పోలీసులే మూకలకు సహకరిస్తున్నారనే ఆరోపణలు అక్కడి హిందువుల భవిష్యత్తును ప్రశ్నార్థకం చేస్తున్నాయి.