Brendan Taylor: జింబాబ్వే క్రికెటర్ బ్రెండన్ టేలర్, ఇంగ్లాండ్ దిగ్గజ పేసర్ జేమ్స్ ఆండర్సన్ పేరు మీద ఉన్న ఒక అరుదైన రికార్డును బద్దలు కొట్టారు. క్రికెట్‌లో ’21వ శతాబ్దంలో అత్యధిక కాలం టెస్ట్ క్రికెట్ ఆడిన ఆటగాడు’ అనే రికార్డును బ్రెండన్ టేలర్ ఇప్పుడు తన పేరిట లిఖించుకున్నారు. 2004లో జింబాబ్వే తరపున టెస్ట్ క్రికెట్‌లోకి అరంగేట్రం చేసిన బ్రెండన్ టేలర్, ఇటీవల న్యూజిలాండ్‌తో జరిగిన తన తాజా టెస్ట్ మ్యాచ్‌తో ఈ రికార్డు సాధించారు. ఆయన టెస్ట్ కెరీర్ ఇప్పటివరకు 21 సంవత్సరాల 93 రోజుల పాటు కొనసాగింది. ఇంతకు ముందు ఈ రికార్డు ఇంగ్లాండ్ దిగ్గజ బౌలర్ జేమ్స్ ఆండర్సన్ పేరిట ఉండేది. ఆయన టెస్ట్ కెరీర్ 21 సంవత్సరాల 51 రోజులు.
కాగా బ్రెండన్ టేలర్ (39) 2022లో అంతర్జాతీయ క్రికెట్ కౌన్సిల్ (ICC) విధించిన నిషేధం కారణంగా కొంతకాలం క్రికెట్‌కు దూరమయ్యారు.ఐసీసీ నిషేధం ఎత్తివేసిన తర్వాత, తాజాగా న్యూజిలాండ్‌తో జరిగిన టెస్ట్ సిరీస్‌తో అతను మళ్లీ అంతర్జాతీయ క్రికెట్‌లోకి రీఎంట్రీ ఇచ్చారు. ఈ మ్యాచ్‌లోనే ఈ అరుదైన రికార్డును సృష్టించారు.ఈ రికార్డు టెస్ట్ క్రికెట్‌లో సుదీర్ఘకాలం పాటు కొనసాగడానికి ఆటగాళ్లకు ఉన్న అంకితభావం, నిలకడను సూచిస్తుంది. ఫాస్ట్ బౌలర్ అయిన ఆండర్సన్ ఈ రికార్డును సాధించడం ఎంత గొప్ప విషయమో, అదే స్థాయిలో బ్యాట్స్‌మెన్ అయిన టేలర్ తిరిగి వచ్చి ఈ రికార్డును బద్దలు కొట్టడం కూడా విశేషమే. బ్రెండన్ టేలర్ జింబాబ్వే క్రికెట్ జట్టుకు చాలా కాలం పాటు కెప్టెన్‌గా, వికెట్ కీపర్‌గా, మరియు అత్యుత్తమ బ్యాట్స్‌మెన్‌లలో ఒకరిగా సేవలందించారు.
Also Read: Rishabh Pant: టీమిండియాకు బిగ్ షాక్.. ఆసియా కప్ నుంచి రిషబ్ పంత్ ఔట్!
అతని కెరీర్ జింబాబ్వే క్రికెట్‌లో కష్టకాలంలో కొనసాగింది. చాలామంది స్టార్ ప్లేయర్స్ జట్టు నుండి వెళ్ళిపోయిన తర్వాత కూడా అతను జట్టును నడిపించారు. 2015 ప్రపంచకప్‌లో బ్రెండన్ టేలర్ అద్భుతమైన ప్రదర్శన కనబరిచారు. ముఖ్యంగా భారత్‌తో జరిగిన మ్యాచ్‌లో అతను చేసిన 138 పరుగులు అతని కెరీర్‌లో ఒక హైలైట్‌గా నిలిచిపోయింది. ఆ మ్యాచ్‌లో జింబాబ్వే ఓడిపోయినప్పటికీ, టేలర్ ఇన్నింగ్స్ ఎప్పటికీ గుర్తుండిపోతుంది.జింబాబ్వే తరపున అంతర్జాతీయ క్రికెట్‌లో అత్యధిక పరుగులు చేసిన ఆటగాళ్లలో అతను మూడో స్థానంలో ఉన్నారు. మరో 62 పరుగులు చేస్తే 10,000 పరుగుల మార్కును చేరుకుని ఆ ఘనత సాధించిన మూడవ జింబాబ్వే క్రికెటర్‌గా రికార్డు సృష్టిస్తారు. టెస్ట్ క్రికెట్‌లో జింబాబ్వే తరపున రెండు వేర్వేరు సందర్భాలలో ఒకే మ్యాచ్‌లో రెండు ఇన్నింగ్స్‌లలో సెంచరీ చేసిన మొదటి బ్యాట్స్‌మెన్ బ్రెండన్ టేలర్.