YV Subba Reddy: రాష్ట్రంలో వైఎస్సార్‌సీపీ కార్యకర్తలపై అక్రమ కేసులు పెట్టి వేధిస్తున్నారని, అయితే ఎవ్వరూ ఆ కేసులకు భయపడాల్సిన అవసరం లేదని వైఎస్సార్‌సీపీ అగ్ర నాయకులు వై.వి. సుబ్బారెడ్డి భరోసా ఇచ్చారు. రైతుల పక్షాన పోరాడి యూరియా కష్టాలు తీర్చడానికి తమ పార్టీ కృషి చేసిందని ఆయన స్పష్టం చేశారు.
ఎన్టీఆర్ జిల్లా వైఎస్సార్‌సీపీ అధ్యక్షుడు దేవినేని అవినాష్ అధ్యక్షతన జరిగిన జిల్లా విస్తృతస్థాయి సమావేశంలో వై.వి. సుబ్బారెడ్డి ముఖ్య అతిథిగా మాట్లాడారు. రాష్ట్రంలోని ప్రతి నియోజకవర్గంలో ఉన్న సమస్యలు తమ దృష్టిలో ఉన్నాయని తెలిపారు. ముఖ్యంగా, వర్షాల వల్ల ప్రజలు ఇబ్బందులు పడుతున్నా ప్రస్తుత ప్రభుత్వం పట్టించుకోవడం లేదని, డయేరియా బాధితులను కూడా అలాగే వదిలేసిందని ఆయన ఆరోపించారు.
జగన్ పథకాలను ప్రైవేటు పరం చేస్తున్నారు: వై.వి. సుబ్బారెడ్డి
అన్ని తప్పులు చేస్తున్నా, మీడియాని అడ్డుపెట్టుకుని వాస్తవాలను కూటమి ప్రభుత్వం కప్పిపెడుతోందని సుబ్బారెడ్డి విమర్శించారు. మాజీ ముఖ్యమంత్రి వై.ఎస్. జగన్ మోహన్ రెడ్డి దూరదృష్టితో 17 మెడికల్ కాలేజీలకు శ్రీకారం చుడితే, ఈ కొత్త ప్రభుత్వం వాటిని ప్రైవేటుపరం చేయాలని చూస్తోందని తెలిపారు.
“విద్య, వైద్యం పేదలకు అందుబాటులో ఉండాలని జగన్ గారు ఎంతో కృషి చేశారు. కానీ ప్రభుత్వ వైఫల్యాలను ప్రజల్లోకి తీసుకెళ్తాం. కల్తీ మద్యం చేసింది కూటమి ప్రభుత్వమే, కానీ నిందలు మాత్రం వైఎస్సార్‌సీపీపై వేస్తున్నారు. ఏకంగా కల్తీ మద్యం ఫ్యాక్టరీ పెట్టేశారు,” అని సుబ్బారెడ్డి మండిపడ్డారు.
పార్టీని బలోపేతం చేసేందుకు గ్రామ, మండల స్థాయి కమిటీల నియామకం పూర్తి చేస్తామని, జగన్ ఆదేశం ప్రకారం 29 అనుబంధ విభాగాల నియామకం జరుగుతుందని ఆయన ప్రకటించారు. ప్రభుత్వంపై పోరాటం చేసేందుకు కోటి సంతకాల సేకరణ కార్యక్రమం చేపడతామని వై.వి. సుబ్బారెడ్డి వెల్లడించారు.
“2029లో అధికారంలోకి వచ్చేది వైఎస్సార్‌సీపీనే”: దేవినేని అవినాష్
అనంతరం మాట్లాడిన జిల్లా అధ్యక్షుడు దేవినేని అవినాష్, జగన్ తీసుకొచ్చిన ప్రభుత్వ మెడికల్ కాలేజీలను ప్రైవేటు పరం చేయడాన్ని వ్యతిరేకిస్తూ తమ పోరాటం కొనసాగుతుందని తెలిపారు.
“కూటమి ప్రభుత్వం అధికారంలోకి వచ్చాక పేదలకు ఆనందం కరువైంది. సంక్షేమం, అభివృద్ధిని తుంగలో తొక్కారు. వైఎస్సార్‌సీపీ హయాంలో అభివృద్ధికి పెద్ద పీట వేశారు, ఇప్పుడు ఆ పరిస్థితి లేదు,” అని ఆయన అన్నారు. ఎన్టీఆర్ జిల్లాలో ఏ కార్యక్రమం చేపట్టినా విజయవంతం చేశామని, ఎన్ని ఇబ్బందులు పెట్టినా వైఎస్సార్‌సీపీకి కార్యకర్తలు అండగా ఉన్నారని అవినాష్ ధీమా వ్యక్తం చేశారు. “2029 లో అధికారంలోకి వచ్చేది వైఎస్సార్‌సీపీనే” అని స్పష్టం చేశారు.
విజయవాడలో జరిగిన ఉత్సవాల పేరుతో ఎంపీ దోచుకున్నారని, ఎంపీ (మెంబర్ ఆఫ్ పార్లమెంట్) అంటే మనీ మేకింగ్ సర్వీస్‌గా పేరు మార్చేశారని అవినాష్ విమర్శించారు. అలాగే, హైదరాబాద్‌లో ఎన్నో స్కాంలు చేసి పారిపోయిన వ్యక్తి కేశినేని చిన్ని అని ఆరోపించారు. “జగన్ జోలికి వస్తే నీ నీచమైన బ్రతుకును బయటకు తీస్తాం. రెడ్ బుక్‌లో పేజీలు చింపితే చిరుగుతాయి. కానీ మా దగ్గర ఉంది డిజిటల్ బుక్. గుర్తుపెట్టుకోండి,” అంటూ దేవినేని అవినాష్ గట్టి హెచ్చరిక చేశారు.