Guinness World Record: వయసు అనేది కేవలం ఒక అంకె మాత్రమేనని, బలమైన సంకల్పం ఉంటే ఏ వయసులోనైనా అద్భుతాలు చేయవచ్చని కెనడాకు చెందిన డోనాజీన్ వైల్డ్ నిరూపించారు. 58 ఏళ్ల వయసులో ఆమె ఏకంగా 4 గంటల 30 నిమిషాల 11 సెకన్ల పాటు ప్లాంక్ పొజిషన్లో ఉండి గిన్నిస్ వరల్డ్ రికార్డు సృష్టించారు. మహిళల విభాగంలో అత్యంత సుదీర్ఘకాలం ప్లాంక్ చేసిన వ్యక్తిగా నిలిచిన ఆమె, పాత రికార్డును పది నిమిషాల తేడాతో అధిగమించడం విశేషం.
డోనాజీన్ ఈ ప్రయాణాన్ని ఒక ప్రమాదం తర్వాత ప్రారంభించారు. 12 ఏళ్ల క్రితం ఆమె చేతి మణికట్టు విరగడంతో సాధారణ వ్యాయామాలు చేయడం ఇబ్బందిగా మారింది. దీంతో ప్రత్యామ్నాయంగా ఆమె ప్లాంక్ చేయడం మొదలుపెట్టారు. ఈ రికార్డు సాధించడం కోసం ఆమె పడిన శ్రమ సామాన్యమైనది కాదు. ప్రతిరోజూ దాదాపు ఆరు గంటల పాటు కఠినమైన శిక్షణ తీసుకునేవారు. ప్లాంక్ చేస్తూనే పుస్తకాలు చదవడం, సినిమాలు చూడటం వంటివి చేస్తూ తన ఏకాగ్రతను పెంచుకున్నారు.
ఇది కూడా చదవండి: Narendra Modi: బీజేపీలో సాధారణ కార్యకర్త కూడా జాతీయ అధ్యక్షుడు కాగలరు
రికార్డు సాధించే క్రమంలో చివరి గంటలో ఆమె మోచేతులు తీవ్రమైన నొప్పితో బాధించినప్పటికీ, పట్టుదల వీడలేదు. అక్కడ ఉన్న ఆమె 12 మంది మనవళ్లు, మనవరాళ్లు ఇచ్చిన ప్రోత్సాహం ఆమెలో మరింత ఉత్సాహాన్ని నింపింది. వారి మద్దతుతోనే నొప్పిని భరిస్తూ లక్ష్యాన్ని చేరుకున్నారు. ఫిట్నెస్ పట్ల ఆమె చూపిన ఈ అంకితభావాన్ని చూసి ఇప్పుడు ప్రపంచవ్యాప్తంగా అందరూ ప్రశంసలు కురిపిస్తున్నారు. వృద్ధాప్యానికి దగ్గరవుతున్న వయసులో కూడా ఇంతటి ఘనత సాధించిన డోనాజీన్ ఇప్పుడు ఎంతో మందికి స్ఫూర్తిగా నిలుస్తున్నారు.
