DGP Shivdhar Reddy: తెలంగాణ రాష్ట్ర పోలీస్ దళంలో కొత్తగా చేరిన మహిళా డీఎస్పీలకు రాష్ట్ర డీజీపీ శివధర్‌రెడ్డి కీలక సందేశం ఇచ్చారు. పోలీసు అధికారిగా తమ బాధ్యతలు సమర్థంగా నిర్వర్తిస్తూనే, ప్రజల హృదయాలను కూడా గెలుచుకోవాలని ఆయన వారికి సూచించారు. కొత్తగా ఎంపికైన ఈ మహిళా డీఎస్పీలు భవిష్యత్తు తరానికి ఆదర్శంగా నిలవాలని డీజీపీ ఆకాంక్షించారు.
హైదరాబాద్ అకాడమీలో శిక్షణ తరగతుల ప్రారంభం
గ్రూప్-1 పరీక్షల ద్వారా ఎంపికైన డీఎస్పీలకు హైదరాబాద్‌లోని పోలీస్ అకాడమీలో శిక్షణ తరగతులు ప్రారంభమయ్యాయి. ఈ ప్రారంభోత్సవ కార్యక్రమానికి డీజీపీ శివధర్‌రెడ్డి ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ, ఈసారి మొత్తం 112 మందికి శిక్షణ ఇస్తున్నామని, ఇంత పెద్ద సంఖ్యలో డీఎస్పీలకు శిక్షణ ఇవ్వడం ఇప్పటివరకు ఇదే అతిపెద్ద బ్యాచ్ అని తెలిపారు. ఈ కార్యక్రమంలో అకాడమీ డైరెక్టర్ అభిలాష బిస్త్ కూడా పాల్గొన్నారు. కొత్త అధికారులు శిక్షణలో ప్రతి అంశాన్ని శ్రద్ధగా నేర్చుకుని, ప్రజలకు మెరుగైన సేవలు అందించాలని డీజీపీ కోరారు.