Crime News: ఢిల్లీ మజ్నుకా తిల్లా ప్రాంతంలో ఘోర ఘటన చోటు చేసుకుంది. ఓ యువకుడు సర్జికల్ బ్లేడ్‌తో మహిళను, ఆరు నెలల బిడ్డను దారుణంగా హత్య చేశాడు. ఉత్తరాఖండ్‌కు చెందిన నిఖిల్ అనే యువకుడే ఈ నేరానికి పాల్పడ్డాడు. పోలీసులు నిఖిల్‌ను అరెస్ట్ చేశారు.
ప్రేమలో మొదలైన కథ… హత్యలతో ముగిసింది
2023లో హల్ద్వానీలో జరిగిన ఓ కార్యక్రమంలో నిఖిల్, సోనాల్ అనే యువతి కలిసి ప్రేమలో పడ్డారు. ఆ తర్వాత ఇద్దరూ కలిసి జీవించసాగారు. అప్పటికే సోనాల్ గర్భవతిగా మారింది. ఆర్థిక ఇబ్బందులు ఎక్కువ కావడంతో బిడ్డను పెంచలేరు అనుకున్నారు. కానీ బిడ్డను గర్భస్రావం చేయలేకపోయారు. చివరకు 2024లో బిడ్డ జన్మించింది.
ఆ బిడ్డను అల్మోరాలోని ఓ వ్యక్తికి రూ.2 లక్షలకు అమ్మేసి, ఆ డబ్బుతో ఢిల్లీకి వచ్చారు. అక్కడ వజీరాబాద్‌లో ఉన్నారు. అనంతరం మజ్నుకా తిల్లాకు మారారు. ఈ మధ్య సోనాల్‌కు అక్కడ నివసిస్తున్న లక్ష్మీ అనే మహిళతో పరిచయం ఏర్పడింది. తరచూ ఆమె ఇంటికే వెళ్తుండడంతో, నిఖిల్‌తో గొడవలు పెరిగాయి. చివరికి సోనాల్.. లక్ష్మీ ఇంటికి వెళ్లి ఉండసాగింది.
అనుమానంతో పెరిగిన పగ
సోనాల్‌కి లక్ష్మీ భర్త దుర్గేష్‌తో సంబంధం ఉందని నిఖిల్‌కు అనుమానం మొదలైంది. వారిద్దరి మధ్య వాట్సాప్‌లో తరచూ గొడవలు జరిగాయి. అంతలోనే సోనాల్ మళ్లీ గర్భవతిగా మారింది. ఈసారి బిడ్డను ఉంచుకోవాలని నిఖిల్ కోరుకున్నాడు. కానీ సోనాల్ దుర్గేష్ సూచనతో గర్భస్రావం చేయించుకుందని నిఖిల్ అనుమానించాడు. అప్పటి నుంచే నిఖిల్ తన మనసులో పగ పెంచుకున్నాడు.
ఇది కూడా చదవండి: Murder case: త‌ల్లి, ప్రియుడితో కలిసి తండ్రిని హ‌త‌మార్చిన కూతురు.. ఆ తర్వాత ఏంచ‌క్కా సెకండ్ షో సినిమాకు వెళ్లింది!
హత్య రోజు
బుధవారం మధ్యాహ్నం లక్ష్మీ, దుర్గేష్ తమ పెద్ద కూతురిని పాఠశాల నుంచి తీసుకురావడానికి వెళ్లారు. ఇంట్లో సోనాల్, ఆరు నెలల శిశువు మాత్రమే ఉన్నారు. ఇదే అవకాశంగా భావించి నిఖిల్ ఇంట్లోకి వెళ్లాడు. ముందుగా గొడవ జరగ్గా, సర్జికల్ బ్లేడ్‌తో సోనాల్ గొంతు కోసి చంపేశాడు. అనంతరం తన పుట్టబోయే బిడ్డను గర్భస్రావం చేయించిందని కోపంతో శిశువును కూడా చంపేశాడు.
బిడ్డ ఏడుపు ఎవరూ వినకూడదనుకుని, నోటికి టేప్ చుట్టాడు. దారుణంగా హత్యలు చేసి తన మొబైల్ అక్కడే వదిలి పారిపోయాడు.
పోలీసుల మానవ వేట
లక్ష్మీ, దుర్గేష్ ఇంటికి వచ్చి జరిగిన దారుణాన్ని చూసి వెంటనే పోలీసులకు సమాచారం ఇచ్చారు. పోలీసులు నిఖిల్ కోసం మానవ వేట ప్రారంభించారు. మొదట తన ఇంట్లో ఆత్మహత్యకు ప్రయత్నించిన నిఖిల్, ఆ తర్వాత బరేలీ, హల్ద్వానీకి పారిపోయాడు. చివరకు హల్ద్వానీలోని ఓ ఇంట్లో దాక్కున్న అతడిని పోలీసులు పట్టుకున్నారు.
నిఖిల్ అంగీకారం
పోలీసుల విచారణలో నిఖిల్ హత్యలు తానే చేశానని అంగీకరించాడు. “నాకు జరిగిన అన్యాయం కోసం నేను ఈ పని చేశాను” అని చెప్పినట్టు సమాచారం.