Fibroids: ప్రస్తుత కాలంలో మహిళల్లో గర్భాశయ ఫైబ్రాయిడ్లు ఒక సాధారణ సమస్యగా మారాయి. ఇవి గర్భాశయం లోపల లేదా బయట పెరిగే క్యాన్సర్ లేని కణితిలు. చాలా సందర్భాల్లో ఇవి ప్రమాదకరం కాకపోయినప్పటికీ, వీటి పరిమాణం, అవి ఉన్న స్థానాన్ని బట్టి మహిళల్లో పలు తీవ్రమైన ఆరోగ్య సమస్యలకు దారితీస్తాయి. ముఖ్యంగా 30 నుంచి 50 ఏళ్ల మధ్య వయస్సు గల స్త్రీలలో ఈ సమస్య ఎక్కువగా కనిపిస్తోంది. ఫైబ్రాయిడ్స్ ఉన్నప్పుడు మహిళలు ప్రధానంగా అధిక రక్తస్రావం సమస్యను ఎదుర్కొంటారు. నెలసరి సమయంలో సాధారణం కంటే ఎక్కువ రోజులు రక్తస్రావం కావడం, గడ్డలు పడటం వంటివి జరుగుతాయి. దీనివల్ల శరీరంలో రక్తం తగ్గి రక్తహీనత ఏర్పడుతుంది. తద్వారా తీవ్రమైన అలసట, నీరసం ,శ్వాస తీసుకోవడంలో ఇబ్బంది వంటి లక్షణాలు కనిపిస్తాయి. అలాగే, పొత్తికడుపులో భారంగా ఉండటం, నడుము నొప్పి, నెలసరి సమయంలో తీవ్రమైన నొప్పి రావడం వంటివి జరుగుతాయి.
ఫైబ్రాయిడ్లు పరిమాణంలో పెద్దవైనప్పుడు, అవి గర్భాశయానికి సమీపంలో ఉండే ఇతర అవయవాలపై ఒత్తిడి కలిగిస్తాయి. దీనివల్ల తరచుగా మూత్రవిసర్జనకు వెళ్లాల్సి రావడం లేదా మూత్రాశయాన్ని పూర్తిగా ఖాళీ చేయలేకపోవడం వంటి సమస్యలు వస్తాయి. ఫైబ్రాయిడ్లు పురీషనాళంపై ఒత్తిడి పెంచడం వల్ల మలబద్ధకం సమస్య తలెత్తుతుంది. ఇవి వెన్నెముక వైపు ఉన్న నరాలపై ఒత్తిడి తెచ్చి తీవ్రమైన వెన్నునొప్పికి లేదా కాళ్ల నొప్పులకు కారణమవుతాయి. ఫైబ్రాయిడ్స్ వల్ల గర్భధారణలో కూడా ఇబ్బందులు ఎదురవుతాయి. గర్భసంచి లోపలి పొర కింద ఉండే ఫైబ్రాయిడ్లు అండం ఫలదీకరణం చెందడంలో లేదా పిండం స్థిరపడటంలో ఆటంకం కలిగిస్తాయి, ఇది సంతానలేమికి దారితీయవచ్చు. ఒకవేళ గర్భం దాల్చినప్పటికీ, గర్భస్రావం అయ్యే ప్రమాదం ఉంటుంది. అలాగే, ప్రసవ సమయంలో శిశువు అసాధారణ స్థితిలో ఉండటం, నెలలు నిండకుండానే ప్రసవం కావడం లేదా సిజేరియన్ అవసరమయ్యే అవకాశాలు ఎక్కువగా ఉంటాయి. వైద్యుల సూచన ప్రకారం, పొత్తికడుపులో వాపు, అసాధారణ రక్తస్రావం వంటి లక్షణాలు కనిపిస్తే వెంటనే అల్ట్రాసౌండ్ స్కాన్ ద్వారా పరీక్షించుకోవడం మంచిది. ప్రారంభ దశలోనే గుర్తిస్తే మందులు లేదా చిన్నపాటి సర్జరీల (Laparoscopy) ద్వారా ఈ సమస్యను సమర్థవంతంగా పరిష్కరించవచ్చు.