KTR: తెలంగాణ రాజకీయాల్లో మరోసారి మాటల యుద్ధం మొదలైంది. మాజీ హోంమంత్రి సబితా ఇంద్రారెడ్డి ఇంటి వద్ద జరిగిన ఘటనపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర స్థాయిలో స్పందించారు. పోలీసుల తీరు, అధికార యంత్రాంగంపై ఆయన ఆగ్రహం వ్యక్తం చేస్తూ, భవిష్యత్తులో వారికి తగిన గుణపాఠం చెబుతామని హెచ్చరించారు.
కేటీఆర్ ఆగ్రహం, తీవ్ర హెచ్చరికలు
కేటీఆర్ చేసిన వ్యాఖ్యలు ప్రస్తుతం రాజకీయ వర్గాల్లో చర్చనీయాంశంగా మారాయి. సబితా ఇంద్రారెడ్డిని పోలీసులు అడ్డుకోవడం, ఆమె పట్ల వ్యవహరించిన తీరుపై కేటీఆర్ తీవ్ర అసంతృప్తిని వెళ్లగక్కారు. ‘హోంమంత్రిగా పని చేసిన సబితమ్మ మీద పోలీసులు ఎగురుతున్నారు’ అని పేర్కొంటూ, అధికారుల ప్రవర్తనను తప్పుపట్టారు.
అధికారంలో ఉన్న కాంగ్రెస్ నాయకులు, ఉన్నత హోదాలో ఉన్న ఐఏఎస్, ఐపీఎస్ అధికారులు పచ్చి అబద్ధాలు మాట్లాడుతున్నారని కేటీఆర్ ఆరోపించారు. ‘కాంగ్రెస్ నాయకుల్లా పచ్చి అబద్ధాలు మాట్లాడుతున్నారు’ అని ఆయన వ్యాఖ్యానించారు.
మరో మూడేళ్ళలో అధికారంలోకి వస్తాం..
కేటీఆర్ చేసిన వ్యాఖ్యల్లో ముఖ్యంగా భవిష్యత్తుపై చేసిన హెచ్చరికలు సంచలనం సృష్టిస్తున్నాయి. ‘మరో మూడేళ్ళలో మేము అధికారంలోకి వస్తాం.. అప్పుడు అతి చేసే, అబద్ధాలాడే ఒక్కొక్కరికి ఇసాబ్ కితాబ్ సెటిల్ చేసే బాధ్యత నాది’ అంటూ కేటీఆర్ చేసిన వ్యాఖ్యలు కాంగ్రెస్ ప్రభుత్వానికి, అధికారులకు ఒక గట్టి హెచ్చరికగా భావించవచ్చు. ఆయన ఈ వ్యాఖ్యల ద్వారా తమ పార్టీ మళ్లీ అధికారంలోకి వస్తే, ప్రస్తుత అధికారుల వైఖరికి తగిన మూల్యం చెల్లిస్తామని స్పష్టం చేశారు.