Periyakaruppan: తమిళనాడు ఉప ముఖ్యమంత్రి, మంత్రి ఉదయనిధి స్టాలిన్ పుట్టినరోజు వేడుకల్లో జరిగిన ఓ సంఘటన ఇప్పుడు రాష్ట్రంలో తీవ్ర రాజకీయ, సామాజిక చర్చకు దారితీసింది. ఆ వేడుకల్లో భాగంగా ఏర్పాటు చేసిన ఒక సాంస్కృతిక కార్యక్రమంలో అశ్లీలంగా ఉన్నట్లు ఆరోపణలు వచ్చిన నృత్య ప్రదర్శనను చూస్తూ, ఓ సీనియర్ మంత్రి చప్పట్లు కొట్టడం, నృత్యకారులను ప్రోత్సహించడం వీడియో రూపంలో వైరల్ కావడంతో ఈ వివాదం రాజుకుంది. నవంబర్ 27న ఉదయనిధి స్టాలిన్ పుట్టినరోజు సందర్భంగా డీఎంకే నాయకులు, కార్యకర్తలు పలు కార్యక్రమాలను నిర్వహించారు. అందులో భాగంగా జరిగిన ఒక కార్యక్రమంలో ఈ ఘటన చోటుచేసుకుంది.గ్రామీణాభివృద్ధి శాఖ మంత్రి ఎస్. పెరియకరుప్పన్ ఈ కార్యక్రమంలో పాల్గొన్నారు. వైరల్ అవుతున్న వీడియోలో, మంత్రి పెరియకరుప్పన్ వేదికపై జరుగుతున్న అభ్యంతరకర నృత్య ప్రదర్శనను వీక్షించారు. అంతేకాకుండా, ఆయన నృత్యకారులను మరింత దగ్గరగా వచ్చి నృత్యం చేయమని ప్రోత్సహించినట్లుగా కూడా ఆరోపణలు వినిపిస్తున్నాయి.
Also Read: Panchayat Elections: తెలంగాణ ఎన్నికల సంఘం: వేలంపాట, బెదిరింపులతో ఏకగ్రీవాలు చెల్లవు!
ఈ వీడియో సోషల్ మీడియాలో విపరీతంగా షేర్ అవుతోంది. ప్రభుత్వంలో కీలక పదవిలో ఉన్న మంత్రి, బహిరంగ వేదికపై ఇటువంటి అసభ్యకరమైన ప్రదర్శనను ప్రోత్సహించడం ఏంటని నెటిజన్లు, ప్రతిపక్ష పార్టీల నాయకులు తీవ్ర స్థాయిలో ధ్వజమెత్తుతున్నారు. ప్రతిపక్ష పార్టీలు ఈ ఘటనను డీఎంకే సంస్కృతికి అద్దం పడుతోందని ఆరోపిస్తున్నాయి. సంస్కృతి, సంప్రదాయాలు, విలువలకు ప్రాధాన్యత ఇస్తామని చెప్పే పార్టీ మంత్రులు ఇలాంటి చర్యలకు పాల్పడటం సరికాదని దుయ్యబడుతున్నాయి. ఈ వివాదంపై అధికార డీఎంకే ఇప్పటివరకు అధికారికంగా స్పందించలేదు. అయితే, పార్టీ వర్గాలు మాత్రం ఇది ప్రైవేట్ ఈవెంట్లో జరిగిన సాధారణ అంశంగా కొట్టిపారేయడానికి ప్రయత్నిస్తున్నట్లు సమాచారం. ఒకవైపు రాష్ట్రం సైక్లోన్ ముప్పుతో అప్రమత్తంగా ఉన్న సమయంలో, ప్రజా సమస్యలను పక్కనపెట్టి అధికార పార్టీ మంత్రులు ఇలాంటి వేడుకల్లో పాల్గొనడంపై విమర్శలు వెల్లువెత్తుతున్నాయి.