Usman Khawaja: ఆస్ట్రేలియా క్రికెట్ చరిత్రలో తనకంటూ ఒక ప్రత్యేక అధ్యాయాన్ని లిఖించుకున్న వెటరన్ ఓపెనర్ ఉస్మాన్ ఖవాజా అంతర్జాతీయ క్రికెట్కు వీడ్కోలు పలకాలని నిర్ణయించుకున్నారు. సిడ్నీ వేదికగా జరగనున్న టెస్ట్ మ్యాచ్ తన కెరీర్లో ఆఖరిది కానుందని ఆయన ప్రకటించడంతో క్రికెట్ ప్రపంచంలో ఒక శకం ముగియనుంది. పాకిస్థాన్లో జన్మించి, ఆస్ట్రేలియా జాతీయ జట్టుకు ప్రాతినిధ్యం వహించిన తొలి ముస్లిం క్రికెటర్గా రికార్డు సృష్టించిన ఖవాజా, సుదీర్ఘ కాలం పాటు ఆసీస్ బ్యాటింగ్ లైనప్లో కీలక పిల్లర్ గా నిలిచారు. ప్రస్తుతం 37 ఏళ్ల వయసున్న ఆయన, పెరుగుతున్న వయస్సు, ఫిట్నెస్ కారణాల దృష్ట్యా 2026 నాటికి ఆట నుంచి తప్పుకోవాలని భావించినప్పటికీ, తాజా పరిణామాల నేపథ్యంలో రిటైర్మెంట్ నిర్ణయాన్ని వెల్లడించారు.
తన రిటైర్మెంట్ సందర్భంగా ఖవాజా భావోద్వేగపూరితమైన వ్యాఖ్యలు చేశారు. తన సుదీర్ఘ ప్రయాణంలో ఎదుర్కొన్న జాతి వివక్ష గురించి ఆయన ఆవేదన వ్యక్తం చేశారు. తాను నల్లజాతి క్రికెటర్ కావడంతో ఆస్ట్రేలియా తరఫున ఆడలేనని చాలా మంది విమర్శించారని, కానీ వాటన్నింటినీ అధిగమించి జట్టులో స్థానం సంపాదించుకోవడం గర్వంగా ఉందని పేర్కొన్నారు. జట్టులోని కొందరు సభ్యులు, మీడియా తన అంకితభావాన్ని శంకించినప్పటికీ, మైదానంలో పరుగుల వర్షం కురిపించి అందరికీ సమాధానం ఇచ్చానని ఆయన గుర్తు చేసుకున్నారు. ముఖ్యంగా గాయాలైన సమయంలో ఇతర ఆటగాళ్లకు లభించిన సానుభూతి తనకు దక్కలేదని, తన విషయంలో వివక్ష చూపేవారని ఆయన వాపోయారు.
Also Read: Veng sarkar: సర్ఫరాజ్ను సెలెక్ట్ చేయకపోవడం సిగ్గుచేటు
ఖవాజా కెరీర్ గణాంకాలు చూస్తే ఆయన ఎంతటి గొప్ప ఆటగాడో అర్థమవుతుంది. ఇప్పటివరకు 87 టెస్టులు, 40 వన్డేలు, 9 టీ20లు ఆడిన ఆయన, అంతర్జాతీయ క్రికెట్లో మొత్తం 8,001 పరుగులు సాధించారు. 2023లో ఆస్ట్రేలియా వరల్డ్ టెస్ట్ ఛాంపియన్షిప్ (WTC) గెలవడంలో ఖవాజాది కీలక పాత్ర. ఇటీవలి కాలంలోనూ ఆయన ఫామ్ అద్భుతంగా ఉంది. 2025లో ఆడిన 18 ఇన్నింగ్స్ల్లోనే 614 పరుగులు చేసిన ఆయన, శ్రీలంకతో జరిగిన మ్యాచ్లో 232 పరుగుల భారీ స్కోరుతో సత్తా చాటారు.
డేవిడ్ వార్నర్ రిటైర్మెంట్ తర్వాత ఆస్ట్రేలియా ఓపెనింగ్ భారాన్ని మోసిన ఖవాజా ఇప్పుడు తప్పుకోవడంతో, ఆస్ట్రేలియా క్రికెట్ మేనేజ్మెంట్ కొత్త ఓపెనర్ కోసం అన్వేషణ మొదలుపెట్టింది. ఇప్పటికే స్టీవ్ స్మిత్ను ఓపెనర్గా పంపడం, శామ్ కొంస్టాస్ వంటి యువ ఆటగాళ్లను సిద్ధం చేయడం వంటి ప్రయోగాలు జరుగుతున్నాయి. ఏది ఏమైనా, క్లిష్ట పరిస్థితుల్లో సంయమనంతో ఆడి జట్టును గట్టెక్కించే ఖవాజా వంటి నమ్మకమైన ఆటగాడి లోటు ఆసీస్ జట్టుకు స్పష్టంగా కనిపిస్తుందని క్రీడా విశ్లేషకులు అభిప్రాయపడుతున్నారు.