Ujjaini Mahankali Bonalu: తెలంగాణ సంస్కృతి, సంప్రదాయాలకు ప్రతీకగా నిలిచే బోనాల జాతరకు రంగం సిద్ధమైంది. సికింద్రాబాద్‌లోని ప్రసిద్ధ ఉజ్జయిని మహంకాళి అమ్మవారి ఆలయంలో ఈ నెల 13వ తేదీన (ఆదివారం) బోనాల జాతర ఘనంగా ప్రారంభం కానుంది. ఈ మహోత్సవం కోసం ఆలయ అధికారులు, ప్రభుత్వ యంత్రాంగం అన్ని ఏర్పాట్లు పూర్తి చేసింది. లక్షలాదిగా భక్తులు తరలివచ్చే అవకాశం ఉండటంతో, ఎలాంటి అవాంఛనీయ ఘటనలు జరగకుండా పోలీసులు పటిష్టమైన భద్రతను ఏర్పాటు చేస్తున్నారు.
2,500 మంది పోలీసులతో బందోబస్తు
బోనాల జాతర సందర్భంగా శాంతిభద్రతల పరిరక్షణకు పోలీసులు భారీ ఏర్పాట్లు చేశారు. దాదాపు 2,500 మంది పోలీసులు బందోబస్తులో పాల్గొంటారని ఉన్నతాధికారులు తెలిపారు. భక్తులకు ఎలాంటి ఇబ్బందులు కలగకుండా, తోపులాటలు జరగకుండా ప్రత్యేక చర్యలు తీసుకుంటున్నారు. ఆలయం లోపల, బయట, క్యూలైన్లలో పోలీసులు పహారా కాసి, రద్దీని నియంత్రించనున్నారు. సీసీ కెమెరాల ద్వారా కూడా నిరంతరం పరిస్థితిని పర్యవేక్షించనున్నారు.
ట్రాఫిక్‌ ఆంక్షలు – వైన్‌షాపులు బంద్‌
బోనాల జాతర సందర్భంగా సికింద్రాబాద్‌ పరిసర ప్రాంతాల్లో ట్రాఫిక్‌ ఆంక్షలు అమలులో ఉంటాయి. ముఖ్యంగా జాతర జరిగే 13వ తేదీన, ఆ మరుసటి రోజు 14వ తేదీన ట్రాఫిక్‌ మళ్లింపులు ఉంటాయని పోలీసులు ప్రకటించారు. ప్రత్యామ్నాయ మార్గాలను ఉపయోగించుకోవాలని వాహనదారులకు సూచించారు.ఇక, జాతర నేపథ్యంలో 13వ తేదీ (ఆదివారం) మరియు 14వ తేదీ (సోమవారం) హైదరాబాద్‌ వ్యాప్తంగా అన్ని వైన్‌షాపులను మూసివేయాలని ప్రభుత్వం ఆదేశాలు జారీ చేసింది. శాంతిభద్రతల పరిరక్షణలో భాగంగా ఈ నిర్ణయం తీసుకున్నట్లు అధికారులు వెల్లడించారు.
బోనాల జాతర తెలంగాణ రాష్ట్రానికి ఒక పెద్ద పండుగ. భక్తులు ఎలాంటి ఇబ్బందులు లేకుండా అమ్మవారిని దర్శించుకునేలా అధికారులు అన్ని ఏర్పాట్లు చేస్తున్నారు.