Tollywood: సినీ ఇండస్ట్రీలో కాస్టింగ్ కౌచ్ అనేది ఎన్నాళ్లుగానో చర్చనీయాంశంగా మారింది. ఇప్పటికే పలు నటీమణులు తమకు ఎదురైన చేదు అనుభవాలను బహిరంగంగా వెల్లడించారు. తాజాగా బాలీవుడ్, టాలీవుడ్ చిత్రాల్లో నటించిన నటి సయామీ ఖేర్ కూడా ఈ అంశంపై తన తెలిపారు.
ఓ తాజా ఇంటర్వ్యూలో సయామీ మాట్లాడుతూ, టాలీవుడ్‌లో కెరీర్ ఆరంభంలో ఓ మహిళా ఏజెంట్ తనకు సినిమా అవకాశాల విషయంలో “సర్దుకుపోవాల్సి ఉంటుంది” అంటూ సూచించిందని చెప్పారు. “ఒక మహిళ అయి మరో మహిళతో ఈ రకంగా మాట్లాడడం నన్ను గాఢంగా కలిచివేసింది,” అని ఆమె తెలిపింది. తాను అలాంటి పనుల నుంచి పూర్తిగా దూరంగా ఉంటానని, తనకు ఉన్న విలువల్ని ఎప్పుడూ అతిక్రమించనని ఆమె ఘాటుగా తిరస్కరించారట.
సయామీ ఖేర్ 2015లో ‘రేయ్’ అనే చిత్రంతో టాలీవుడ్‌లోకి అడుగుపెట్టారు. అనంతరం 2016లో ‘మిర్జియా’ ద్వారా బాలీవుడ్‌లో ప్రవేశించారు. ఆమె నటించిన ఇతర ప్రముఖ చిత్రాలలో ‘మౌళి’, ‘చోక్డ్’, ‘వైల్డ్ డాగ్’, ‘ఘూమర్’ ఉన్నాయి. వెబ్‌సిరీస్‌ల్లోనూ ఆమె తన నటనతో ఆకట్టుకున్నారు — ‘స్పెషల్ ఆప్స్’, ‘ఫాదూ’ వంటివి ఇందుకు ఉదాహరణలు.
కెరీర్ ఆరంభంలో ఎదురైన ఆ సంఘటన తాను మరిచిపోలేనిది అని సయామీ తెలిపారు. “మొదట ఆ మాటల అర్థం కాకుండా నటించాను. కానీ ఆమె పదేపదే అదే సూచించడంతో, స్పష్టంగా ‘నాకు కొన్ని పరిమితులు ఉన్నాయి. వాటిని దాటలేను’ అని చెప్పాల్సి వచ్చింది,” అని ఆమె గుర్తుచేసుకున్నారు. తన కెరీర్‌లో ఓ మహిళ నుంచే ఈ రకమైన సూచన రావడం అదే మొదటిసారి, చివరిసారిగా నిలిచిందని చెప్పారు.
ఇటీవల సయామీ ఖేర్ ‘జాట్’ అనే యాక్షన్ డ్రామాలో పోలీసు అధికారిణి విజయలక్ష్మి పాత్రలో కనిపించి విమర్శకుల ప్రశంసలు అందుకున్నారు. ప్రస్తుతం ఆమె హిందీ, తెలుగు భాషల చిత్రాలతో బిజీగా ఉన్నారు.