Tirumla: వచ్చే నెల (మార్చి) 3, 2026 (మంగళవారం) నాడు చంద్రగ్రహణం ఉండటంతో తిరుమల శ్రీవేంకటేశ్వర స్వామి వారి ఆలయ తలుపులను సుమారు 10 గంటల పాటు మూసివేయనున్నట్లు టీటీడీ (TTD) అదనపు ఈవో వెంకయ్య చౌదరి వెల్లడించారు. ఆగమ శాస్త్రం ప్రకారం గ్రహణ సమయానికి 6 గంటల ముందుగానే ఆలయాన్ని మూసివేయడం ఆనవాయితీ కావడంతో, ఆ రోజు ఉదయం 9 గంటలకే తలుపులు మూసివేస్తారు.
గ్రహణ సమయం మరియు ఆలయ షెడ్యూల్
మార్చి 3న మధ్యాహ్నం 3:20 గంటలకు చంద్రగ్రహణం ప్రారంభమై, సాయంత్రం 6:47 గంటలకు ముగుస్తుంది. ఈ నేపథ్యంలో భక్తులు గమనించాల్సిన సమయాలు ఇక్కడ ఉన్నాయి:
మార్చి 3, రోజున ఉదయం 9:00 గంటలకు ఆలయం మూసివేస్తారు తిరిగి సాయంత్రం 7:30 గంటలకు ఆలయ తలుపులు తెరుస్తారు. గ్రహణం తరువాత రాత్రి 7:30 నుండి 8:30 వరకు శుద్ధి, పుణ్యాహవచనం నిర్వహిస్తారు. తిరిగి రాత్రి 8:30 గంటల నుండి భక్తులకు సర్వదర్శనం పునఃప్రారంభమవుతుంది.
రద్దయిన సేవలు – భక్తుల ఏర్పాట్లు
గ్రహణం కారణంగా ఆ రోజు తిరుమలలో అనేక ఆర్జిత సేవలు, దర్శనాలను టీటీడీ రద్దు చేసింది.
- రద్దయిన సేవలు: కళ్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవ మరియు అష్టదళ పాద పద్మారాధన సేవలు రద్దు చేయబడ్డాయి.
- దర్శనాలు: వీఐపీ బ్రేక్ దర్శనం, శ్రీవాణి దర్శనం, రూ.300 ప్రత్యేక ప్రవేశ దర్శనాలు కూడా ఆ రోజు ఉండవు.
- అన్నప్రసాదం: ఉదయం 9 గంటల నుండి రాత్రి వరకు అన్నప్రసాద వితరణ కూడా నిలిపివేయబడుతుంది.
- ఆహార పొట్లాలు: క్యూలైన్లలో వేచి ఉండే భక్తుల కోసం దాదాపు 40 వేల పులిహోర ప్యాకెట్లను పంపిణీ చేసేందుకు ఏర్పాట్లు చేస్తున్నారు.
కుమారధార తీర్థ ముక్కోటి ఉత్సవాలు
విశేషమేమిటంటే, అదే రోజున ప్రసిద్ధ కుమారధార తీర్థ ముక్కోటి ఉత్సవాలు కూడా జరగనున్నాయి. శేషాచల అడవుల్లోని ఈ పవిత్ర తీర్థానికి వెళ్లే భక్తుల కోసం టీటీడీ ఇంజనీరింగ్ విభాగం ఇప్పటికే తగిన ఏర్పాట్లు చేస్తోంది. తాగునీటి కుళాయిలు, నిచ్చెనలు మరియు భద్రతా సిబ్బందిని మార్గమధ్యంలో అందుబాటులో ఉంచనున్నారు. భక్తులు ఉదయం 5 గంటల నుండి 10 గంటల లోపు మాత్రమే తీర్థం వైపు అనుమతించబడే అవకాశం ఉందని అధికారులు తెలిపారు.