The Raja Saab Trailer: టాలీవుడ్ రెబల్ స్టార్, పాన్ ఇండియా సూపర్ స్టార్ ప్రభాస్ అభిమానులు ఎంతగానో ఎదురుచూస్తున్న క్షణం రానే వచ్చింది. మారుతి దర్శకత్వంలో రూపుదిద్దుకుంటున్న హారర్-కామెడీ వండర్ ‘ది రాజాసాబ్’ నుంచి మేకర్స్ తాజాగా ట్రైలర్ 2.0ను విడుదల చేశారు. రెండు రోజుల క్రితం హైదరాబాద్లో జరిగిన ప్రీ-రిలీజ్ ఈవెంట్లో ట్రైలర్ వస్తుందని ఆశించి నిరాశ చెందిన ఫ్యాన్స్కు, ఈ లేటెస్ట్ కట్స్ పక్కా ‘పైసా వసూల్’ ట్రీట్గా నిలిచాయి.
విజువల్ వండర్.. వింటేజ్ ప్రభాస్!
పీపుల్ మీడియా ఫ్యాక్టరీ పతాకంపై టీజీ విశ్వప్రసాద్ ఎంతో ప్రతిష్టాత్మకంగా నిర్మించిన ఈ చిత్ర ట్రైలర్ చూస్తుంటే, బాక్సాఫీస్ దగ్గర ఈ సంక్రాంతికి ప్రభాస్ సునామీ సృష్టించడం ఖాయమనిపిస్తోంది. ట్రైలర్లో ప్రభాస్ ఎంట్రీ, ఆయన వేసిన స్టెప్పులు చూస్తుంటే ఫ్యాన్స్కు పాత ‘వింటేజ్ డార్లింగ్’ గుర్తుకు రాక మానరు. భారీ సెట్టింగ్స్, అద్భుతమైన విజువల్ ఎఫెక్ట్స్ (VFX) సినిమా స్థాయిని మరో మెట్టు ఎక్కించాయి. “నువ్వు ఒంటరివి కావు” అనే ట్యాగ్లైన్తో సాగే ఈ కథలో హారర్ ఎలిమెంట్స్తో పాటు మారుతి మార్క్ కామెడీ పుష్కలంగా ఉన్నట్లు ట్రైలర్ స్పష్టం చేస్తోంది.
తమన్ సంగీతం.. భారీ తారాగణం
ఈ ట్రైలర్కు ఎస్.ఎస్. తమన్ అందించిన నేపథ్య సంగీతం (BGM) ప్రధాన ఆకర్షణగా నిలిచింది. ప్రతి సీన్ను తన మ్యూజిక్తో ఎలివేట్ చేశారు. ఇక బాలీవుడ్ దిగ్గజాలు సంజయ్ దత్, బోమన్ ఇరానీల స్క్రీన్ ప్రెజెన్స్ సినిమాకు పాన్ ఇండియా అప్పీల్ను తెచ్చిపెట్టింది. ప్రభాస్ సరసన మాళవిక మోహనన్, నిధి అగర్వాల్, రిద్ది కుమార్ తమ అందచందాలతో మాయ చేశారు.
రిలీజ్ అప్డేట్స్: జనవరి 9న రచ్చ మొదలు!
అభిమానుల అంచనాలను రెట్టింపు చేస్తూ ‘ది రాజాసాబ్’ 2026 జనవరి 9న గ్రాండ్గా థియేటర్లలోకి రాబోతోంది. అయితే, ఒక రోజు ముందుగానే అంటే జనవరి 8వ తేదీ రాత్రి నుంచే ప్రీమియర్ షోలు పడే అవకాశం ఉంది. ప్రభుత్వం నుంచి అనుమతులు లభిస్తే టికెట్ రేట్ల పెంపు, అర్ధరాత్రి షోల గురించి పూర్తి క్లారిటీ రానుంది. ఇప్పటికే ఈ సినిమాపై ఉన్న బజ్ చూస్తుంటే, ఓపెనింగ్స్ పరంగా పాత రికార్డులన్నీ తుడిచిపెట్టుకుపోవడం ఖాయంగా కనిపిస్తోంది.