మలేషియాలో జరుగుతున్న అండర్-19 మహిళల టీ20 ప్రపంచకప్‌లో భారత జట్టు విశేష ప్రతిభ కనబరుస్తోంది. ఫిబ్రవరి 2న జరిగిన ఫైనల్ మ్యాచ్‌లో భారత యువతీ జట్టు దక్షిణాఫ్రికాను 9 వికెట్ల తేడాతో ఓడించి ప్రపంచ విజేతగా నిలిచింది. ఈ విజయంతో భారత మహిళల అండర్-19 జట్టు వరుసగా రెండోసారి ఛాంపియన్‌షిప్‌ను సాధించింది. భారత జట్టు టోర్నమెంట్‌లో అద్భుత ప్రదర్శన చేస్తూ, సెమీఫైనల్‌లో ఇంగ్లాండ్‌ను 9 వికెట్ల తేడాతో ఓడించి ఫైనల్‌కు చేరుకుంది.
ఫైనల్ మ్యాచ్‌లో మొదట బ్యాటింగ్ చేసిన దక్షిణాఫ్రికా భారత బౌలర్ల ధాటికి 83 పరుగులకే ఆలౌటైంది. అనంతరం టీమిండియా 11.2 ఓవర్లలో కేవలం 1 వికెట్ కోల్పోయి లక్ష్యాన్ని చేరుకుని ఘన విజయం సాధించింది. ఈ మ్యాచ్‌లో తెలంగాణకు చెందిన ఓపెనర్ గొంగడి త్రిష అసాధారణ ఆటతీరు ప్రదర్శించింది. మొదట బౌలింగ్‌లో 3 కీలక వికెట్లు తీసిన ఈ తెలుగు యువతీ, బ్యాటింగ్‌లోనూ అద్భుతంగా రాణించింది. 44 పరుగులతో అజేయంగా నిలిచి, టీమిండియా గెలుపులో ముఖ్య భూమిక పోషించింది.
ఈ విజయంతో భారత యువ జట్టు కొత్త సంవత్సరాన్ని ఘనంగా ప్రారంభించగా, సోషల్ మీడియాలో అభినందనల వెల్లువ కొనసాగుతోంది. 2023లో షఫాలీ వర్మ నేతృత్వంలో భారత జట్టు తొలిసారి అండర్-19 మహిళల టీ20 ప్రపంచకప్‌ను గెలుచుకోగా, ఈసారి మరోసారి టైటిల్‌ను అందుకుని చరిత్ర సృష్టించింది.