Film Chamber: తెలుగు చలనచిత్ర వాణిజ్య మండలి (Film Chamber) ఎన్నికల ఫలితాలు టాలీవుడ్లో సెగలు పుట్టిస్తున్నాయి. ఆదివారం ఉదయం ప్రారంభమైన పోలింగ్ ప్రక్రియ ముగియడంతో, అందరి కళ్లు ఇప్పుడు కౌంటింగ్ కేంద్రంపైనే ఉన్నాయి. ఈసారి ఎన్నికల్లో మొత్తం 3,287 ఓట్లకు గాను కేవలం 1,421 ఓట్లు (43 శాతం) మాత్రమే నమోదు కావడంతో, తక్కువ పోలింగ్ ఎవరికి లాభిస్తుందన్నది ఆసక్తికరంగా మారింది.
సెక్టార్ల వారీగా ఫలితాల వేట
ప్రస్తుతం అందుతున్న సమాచారం ప్రకారం, స్టూడియోస్ మరియు ఎగ్జిబిటర్స్ సెక్టార్లలో కౌంటింగ్ ఒక కొలిక్కి వచ్చింది.
- స్టూడియోస్ సెక్టార్: ఇక్కడ ‘మన ప్యానెల్’ స్పష్టమైన ఆధిక్యం కనబరిచింది. ఈ ప్యానెల్ నుంచి ముగ్గురు ఈసీ మెంబర్లుగా గెలుపొందగా, ‘ప్రోగ్రెసివ్ ప్యానెల్’ కేవలం ఒక స్థానానికే పరిమితమైంది.
- ఎగ్జిబిటర్స్ సెక్టార్: ఇక్కడ సీన్ రివర్స్ అయింది. దిగ్గజ నిర్మాత డి. సురేష్ బాబు నేతృత్వంలోని ప్రోగ్రెసివ్ ప్యానెల్ క్లీన్ స్వీప్ దిశగా దూసుకెళ్తోంది. ఈ ప్యానెల్ నుండి సురేష్ బాబుతో పాటు మరో 14 మంది సభ్యులు ఈసీ మెంబర్లుగా విజయం సాధించడం విశేషం.
ఇది కూడా చదవండి: Mohanlal: ఏంది సామి.. రూ.70 కోట్ల సినిమాకు కోటి వసూళ్లే!
ప్రొడ్యూసర్ సెక్టార్లో ‘ఉత్కంఠ’ – మళ్లీ రీ-కౌంటింగ్!
అత్యంత కీలకమైన ప్రొడ్యూసర్ మరియు డిస్ట్రిబ్యూటర్ సెక్టార్లలో ఫలితాలు హై-డ్రామాకు దారితీశాయి. తొలుత లెక్కింపు పూర్తయినప్పటికీ, కొన్ని సాంకేతిక కారణాలు మరియు అభ్యంతరాల నేపథ్యంలో సభ్యులు రీ-కౌంటింగ్ కోరారు. దీంతో అధికారులు మరోసారి ఓట్లను లెక్కిస్తున్నారు. పెద్ద నిర్మాతలు వర్సెస్ చిన్న నిర్మాతల మధ్య పోరుగా మారిన ఈ సెక్టార్లో ‘ప్రోగ్రెసివ్ ప్యానెల్’ గట్టి పోటీని ఎదుర్కొంటోంది.
అధ్యక్ష పదవి ఎవరికి?
ఎగ్జిక్యూటివ్ ప్యానెల్ నుండి అధ్యక్షుడి ఎంపిక జరగాల్సి ఉంది. ఇప్పటివరకు వచ్చిన ట్రెండ్స్ చూస్తుంటే, సురేష్ బాబు ప్యానెల్కు మెజారిటీ ఈసీ సభ్యుల మద్దతు లభించే అవకాశం కనిపిస్తోంది. వంశీకిషోర్, అనుపమ్ రెడ్డి, డి. సురేష్ బాబు వంటి కీలక నేతలు ఇప్పటికే తమ స్థానాలను భద్రం చేసుకోవడంతో, ఛాంబర్ పగ్గాలు ఎవరికి దక్కుతాయనే దానిపై సస్పెన్స్ మరికొద్ది సేపట్లో వీడనుంది.
ఈ ఎన్నికలు కేవలం పదవుల కోసం మాత్రమే కాదు, ఇండస్ట్రీలో నెలకొన్న డిజిటల్ సర్వీస్ ప్రొవైడర్ ఫీజులు, థియేటర్ల సమస్యలు మరియు చిన్న సినిమాల మనుగడపై ఒక స్పష్టమైన దిశను నిర్దేశించబోతున్నాయి.