Telusu Kada: దీపావళి పండుగ సందర్భంగా అక్టోబరులో థియేటర్లలో విడుదలై ప్రేక్షకులను పలకరించిన రొమాంటిక్ డ్రామా చిత్రం ‘తెలుసు కదా’ ఇప్పుడు డిజిటల్ స్క్రీన్‌పై సందడి చేయడానికి సిద్ధమైంది. ఈ సినిమా నవంబర్ 14 నుండి ప్రముఖ ఓటీటీ ప్లాట్‌ఫామ్ అయిన నెట్‌ఫ్లిక్స్‌లో స్ట్రీమింగ్ కానుంది.
యూత్‌లో మంచి ఫాలోయింగ్ ఉన్న సిద్ధు జొన్నలగడ్డ హీరోగా నటించిన ఈ చిత్రంలో, హీరోయిన్లుగా రాశీఖన్నా (అంజలి పాత్రలో), శ్రీనిధి శెట్టి (రాగ పాత్రలో) కీలక పాత్రలు పోషించారు. సినీ పరిశ్రమలో సుప్రసిద్ధ కాస్ట్యూమ్ డిజైనర్‌గా పేరుగాంచిన నీరజ కోన ఈ సినిమాతోనే దర్శకురాలిగా మారడం విశేషం. టి.జి. విశ్వ ప్రసాద్, కృతి ప్రసాద్ ఈ చిత్రాన్ని పీపుల్‌ మీడియా ఫ్యాక్టరీ పతాకంపై సంయుక్తంగా నిర్మించారు. థమన్ అందించిన సంగీతం, ముఖ్యంగా ‘మల్లిక గంధ’ పాట చార్ట్‌బస్టర్‌గా నిలిచింది.
Also Read: Jharan: వణికిస్తున్న మరో సైకలాజికల్ థ్రిల్లర్!
సినిమా కథాంశం ఏమిటంటే..
వరుణ్ (సిద్ధు జొన్నలగడ్డ) ఒక అనాథ. చిన్నప్పటి నుంచి తనకంటూ ఒక కుటుంబం ఉండాలని కలలు కంటాడు. కాలేజీ రోజుల్లో రాగ కుమార్ (శ్రీనిధి శెట్టి)ను ప్రేమించి, పెళ్లి చేసుకోవాలని నిర్ణయించుకుంటాడు. కానీ, ఊహించని కారణాల వల్ల రాగ అతడిని వదిలి దూరమవుతుంది. ఆ బాధ నుంచి బయటపడిన వరుణ్, అంజలి (రాశీఖన్నా)ను పెళ్లి చేసుకుని కొత్త జీవితాన్ని ప్రారంభిస్తాడు. వారిద్దరికీ పిల్లలంటే ఎంతో ఇష్టం.
అయితే, పెళ్లైన కొన్ని నెలలకే అంజలికి పిల్లలు పుట్టరనే సమస్య ఎదురవుతుంది. దాంతో వారు సరోగసీ ద్వారా బిడ్డను కనాలని నిర్ణయించుకుంటారు. ఈ క్రమంలో, వరుణ్ జీవితంలోకి మళ్లీ రాగ (డాక్టర్‌గా) ప్రవేశిస్తుంది. రాగ వారికి సరోగసీ ద్వారా బిడ్డను కనడానికి ముందుకొస్తుంది. అయితే, వరుణ్, రాగలకు మధ్య గతంలో ఉన్న పరిచయాన్ని అంజలి దగ్గర ఎందుకు దాచారు? రాగ వదిలి వెళ్ళడానికి గల అసలు కారణం ఏమిటి? ఈ సరోగసీ నిర్ణయం వరుణ్, అంజలిల అన్యోన్య బంధంలో ఎలాంటి సంఘర్షణకు దారితీసింది? అనేదే ఈ రొమాంటిక్ డ్రామా చిత్ర ప్రధాన కథాంశం.
సిద్ధు నటన, హీరోయిన్ల గ్లామర్, వైవా హర్ష కామెడీ ప్రేక్షకులను ఆకట్టుకునే ముఖ్య అంశాలుగా నిలిచాయి. థియేటర్లలో అంచనాలను పూర్తిస్థాయిలో అందుకోలేకపోయినప్పటికీ, ఈ చిత్రం ఓటీటీలో యూత్‌ను మెప్పించే అవకాశం ఉంది.