Telangana Rising Global Summit 2025: తెలంగాణ రాష్ట్ర భవిష్యత్తును సరికొత్తగా ఆవిష్కరించే లక్ష్యంతో తెలంగాణ రైజింగ్ గ్లోబల్ సమ్మిట్ 2025 అంగరంగ వైభవంగా జరగనుంది. డిసెంబర్ 8, 9 తేదీల్లో భారత్ ఫ్యూచర్ సిటీలో ఈ ప్రతిష్టాత్మక అంతర్జాతీయ సదస్సు జరుగుతుంది. ఈ సమ్మిట్కు దేశ విదేశాల నుంచి ప్రముఖ పారిశ్రామికవేత్తలు, వివిధ రంగాల నిపుణులు, విద్యావేత్తలు, అలాగే ప్రపంచంలోని పెద్ద పెద్ద సంస్థల ప్రతినిధులు భారీగా తరలిరానున్నారు. ఈ రెండు రోజుల వేడుకలో రాష్ట్ర అభివృద్ధికి సంబంధించిన అనేక ముఖ్యమైన అంశాలపై మొత్తం 27 ప్రత్యేక చర్చా గోష్ఠులు జరుగుతాయి.
ఈ చర్చలలో ముఖ్యంగా ఎనర్జీ, గ్రీన్ మొబిలిటీ, ఐటీ-సెమీకండక్టర్లు, ఆరోగ్యం, విద్య, టూరిజం, పట్టణ మౌలిక వసతులు, వ్యవసాయం, పరిశ్రమలు, మహిళా వ్యాపారవేత్తల ప్రోత్సాహం, గిగ్ ఎకానమీ, సామాజిక సంక్షేమం, స్టార్టప్లు వంటి కీలక రంగాలపై లోతుగా చర్చిస్తారు. ఈ సదస్సులో వరల్డ్ హెల్త్ ఆర్గనైజేషన్ , వరల్డ్ బ్యాంక్, ఏషియన్ డెవలప్మెంట్ బ్యాంక్, యూనీసెఫ్ వంటి అంతర్జాతీయ సంస్థలతో పాటు, దేశ విదేశాలకు చెందిన Micron India, Hitachi Energy, Apollo Hospitals, IIT Hyderabad, NASSCOM, Safran, DRDO, Skyroot, GMR, Tata Realty, Kotak Bank, Goldman Sachs, Deloitte, Swiggy, AWS వంటి అనేక ప్రముఖ సంస్థల ప్రతినిధులు పాల్గొనడం విశేషం.
వ్యాపారం, పరిశ్రమలే కాకుండా, క్రీడలు, సినిమా రంగాల ప్రముఖులు కూడా ఈ సమ్మిట్లో భాగం కాబోతున్నారు. పి.వి. సింధు, అనిల్ కుంబ్లే, పుల్లెల గోపిచంద్, గగన్ నారంగ్, జ్వాలా గుత్తా వంటి క్రీడా దిగ్గజాలు ‘Olympic Gold Quest’ అనే సెషన్లో పాల్గొంటారు. అలాగే, రాజమౌళి, రితేష్ దేశ్ముఖ్, సుకుమార్, గుణీత్ మోంగా, అనుపమా చోప్రా వంటి సినీ ప్రముఖులు ‘Creative Century – Soft Power & Entertainment’ అనే చర్చా కార్యక్రమంలో పాల్గొంటారు.
ఈ సదస్సు ఏర్పాట్లను ముఖ్యమంత్రి రేవంత్ రెడ్డి గారు స్వయంగా పర్యవేక్షిస్తున్నారు. దావోస్లో ఏటా జరిగే వరల్డ్ ఎకనామిక్ ఫోరమ్ తరహాలో అంతర్జాతీయ స్థాయిలో ఈ సదస్సు నిర్వహించాలని ఆయన అధికారులతో తరచుగా సమావేశాలు నిర్వహిస్తూ అన్ని ఏర్పాట్లను సమన్వయం చేస్తున్నారు. ఈ సదస్సులో అత్యంత ముఖ్యమైన అంశం ఏమిటంటే, రెండో రోజున, అంటే డిసెంబర్ 9న, రాష్ట్ర ప్రభుత్వం తెలంగాణ రైజింగ్ 2047 విజన్ డాక్యుమెంట్ను ఆవిష్కరించనుంది. 2047 నాటికి రాష్ట్రాన్ని 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడానికి అవసరమైన రోడ్మ్యాప్ను (మార్గదర్శిని) ఈ డాక్యుమెంట్లో పొందుపరిచారు. ఈ రెండు రోజుల సదస్సు ద్వారా అన్ని రంగాల్లో భవిష్యత్తు తెలంగాణ అభివృద్ధికి అవసరమైన పెట్టుబడులు, టెక్నాలజీ భాగస్వామ్యాలు, నూతన ఆవిష్కరణల దిశగా సమగ్ర ప్రణాళికలను రూపొందించనున్నారు.