Group-1: తెలంగాణలో గ్రూప్-1 అభ్యర్థుల సుదీర్ఘ నిరీక్షణకు తెరపడింది. గత కొంతకాలంగా న్యాయపరమైన చిక్కుల్లో ఉన్న ఈ నియామక ప్రక్రియపై తెలంగాణ హైకోర్టు ధర్మాసనం గురువారం అత్యంత కీలకమైన తుది తీర్పును వెలువరించింది. గ్రూప్-1 నియామకాలు సక్రమంగానే జరిగాయని స్పష్టం చేస్తూ, గతంలో సింగిల్ జడ్జి ఇచ్చిన తీర్పును ప్రధాన న్యాయమూర్తి (సీజే) నేతృత్వంలోని డివిజన్ బెంచ్ పూర్తిగా రద్దు చేసింది. ఈ నిర్ణయంతో ఇప్పటికే ఉద్యోగాలకు ఎంపికై, నియామక పత్రాలు అందుకున్న 562 మంది అభ్యర్థులకు మార్గం సుగమమైంది.
ఈ కేసు వివరాల్లోకి వెళితే.. తెలంగాణ పబ్లిక్ సర్వీస్ కమిషన్ (TGPSC) నిర్వహించిన గ్రూప్-1 మెయిన్స్ పరీక్షల మూల్యాంకనంలో అవకతవకలు జరిగాయని, పారదర్శకత లోపించిందని కొందరు అభ్యర్థులు గతంలో కోర్టును ఆశ్రయించారు. దీనిపై విచారణ జరిపిన సింగిల్ జడ్జి, జనరల్ ర్యాంకింగ్ లిస్టును రద్దు చేయడమే కాకుండా, సమాధాన పత్రాలను తిరిగి మూల్యాంకనం చేయాలని లేదా అవసరమైతే మళ్లీ పరీక్ష నిర్వహించాలని ఆదేశించారు. అయితే, ఈ తీర్పును సవాలు చేస్తూ టీజీపీఎస్సీతో పాటు ఎంపికైన అభ్యర్థులు డివిజన్ బెంచ్ వద్ద అప్పీల్ చేశారు.
Also Read: Manipur: మణిపూర్లో రాష్ట్రపతి పాలన ముగింపు.. కొత్త సీఎంగా ఖేమ్చంద్ సింగ్
తాజా విచారణలో భాగంగా హైకోర్టు ధర్మాసనం అన్ని పక్షాల వాదనలను క్షుణ్ణంగా పరిశీలించింది. పరీక్షా ప్రక్రియలో ఎలాంటి అవకతవకలు జరిగినట్లు ఆధారాలు లేవని, మొత్తం నియామక ప్రక్రియ పారదర్శకంగానే సాగిందని కోర్టు అభిప్రాయపడింది. సింగిల్ జడ్జి ఆదేశాల వల్ల ఎంపికైన అభ్యర్థులకు అన్యాయం జరుగుతుందని భావించిన ధర్మాసనం, ఆ తీర్పును కొట్టివేస్తూ అప్పీల్ పిటిషన్లను అనుమతించింది.
రాష్ట్ర ప్రభుత్వం ఇప్పటికే 562 మందికి నియామక పత్రాలను అందజేయగా, కోర్టు తుది తీర్పు కోసం వారంతా ఉత్కంఠగా ఎదురుచూశారు. ఇప్పుడు హైకోర్టు నుండి సానుకూల తీర్పు రావడంతో ప్రభుత్వం, టీజీపీఎస్సీ అభ్యర్థులు ఊపిరి పీల్చుకున్నారు. 2024లో నిర్వహించిన ఈ పరీక్షా ఫలితాలపై నెలకొన్న సందిగ్ధత ఈ తీర్పుతో పూర్తిగా తొలగిపోయింది. న్యాయస్థానం స్పష్టత ఇవ్వడంతో గ్రూప్-1 అధికారులుగా విధుల్లో చేరడానికి అభ్యర్థులకు ఇక ఎలాంటి ఆటంకాలు లేవు.