Revanth Reddy: వృద్ధాప్యంలో కన్నవారిని నిర్లక్ష్యం చేసే పిల్లలకు గుణపాఠం చెప్పేలా తెలంగాణ ప్రభుత్వం తీసుకొచ్చిన ‘తల్లిదండ్రుల సంరక్షణ చట్టం’ బిల్లుకు రాష్ట్ర అసెంబ్లీ ఆదివారం ఏకగ్రీవంగా ఆమోదం తెలిపింది. ముఖ్యమంత్రి రేవంత్ రెడ్డి ప్రవేశపెట్టిన ఈ బిల్లు ప్రకారం.. తల్లిదండ్రులను సరిగ్గా చూసుకోని ప్రభుత్వ ఉద్యోగుల జీతం నుండి 15 శాతం మొత్తాన్ని ప్రభుత్వం కోత విధిస్తుంది. ఈ మొత్తాన్ని నేరుగా సదరు ఉద్యోగి తల్లిదండ్రుల బ్యాంకు ఖాతాల్లో జమ చేసేలా చట్టంలో నిబంధనలు పొందుపరిచారు.
భక్తితో కాకపోయినా.. భయంతోనైనా!
బిల్లుపై చర్చ సందర్భంగా ముఖ్యమంత్రి రేవంత్ రెడ్డి భావోద్వేగంగా మాట్లాడారు. పిల్లల కోసం తల్లిదండ్రులు తమ శక్తినంతా ధారపోస్తారని, కానీ రెక్కలు వచ్చాక పిల్లలు వారిని పట్టించుకోకపోవడం బాధాకరమని అన్నారు.
-
సామాజిక బాధ్యత: “తల్లిదండ్రులను ప్రేమతో సేవిస్తే ఇలాంటి చట్టాల అవసరమే ఉండదు. కానీ సమాజంలో మారుతున్న పరిస్థితుల దృష్ట్యా, వారి హక్కులను కాపాడాలనే ఉద్దేశంతో ఈ చట్టం తెచ్చాం. భక్తితో కాకపోయినా, కనీసం చట్టం అనే భయంతోనైనా వారిని చూసుకోవాలి” అని సీఎం పేర్కొన్నారు.
-
నిబంధనలు: తల్లిదండ్రులకు ఇచ్చే భృతి నెలకు రూ.10 వేలు సరిపోవని కొందరు అంటున్నారని, అయితే కేంద్రం 2007లో తెచ్చిన చట్టం ప్రకారం రూ.10 వేలకు మించకూడదనే నిబంధన ఉందని ఆయన వివరించారు.
ఉద్యోగులు, ప్రజాప్రతినిధులకు కూడా వర్తింపు
ఈ చట్టం కేవలం ప్రభుత్వ ఉద్యోగులకే పరిమితం కాదని, ప్రజాప్రతినిధులకు కూడా వర్తిస్తుందని ముఖ్యమంత్రి స్పష్టం చేశారు.
-
జీతంలో కోత: తల్లిదండ్రులను నిర్లక్ష్యం చేస్తున్నట్లు తేలితే సంబంధిత అధికారి లేదా ప్రజాప్రతినిధి వేతనం నుండి 15 శాతం కట్ చేస్తారు.
-
సామాజిక బహిష్కరణ: కన్నవారిని రోడ్డున పడేసే వారిని సామాజికంగా బహిష్కరించాలని సీఎం పిలుపునిచ్చారు.
-
అండగా ప్రభుత్వం: ఆత్మీయతకు సంబంధించిన అంశంపై ఇలాంటి చట్టం తేవడం వ్యక్తిగతంగా బాధ కలిగించినా, నిస్సహాయ స్థితిలో ఉన్న వృద్ధులకు అండగా నిలవడమే తమ ప్రభుత్వ లక్ష్యమని ఆయన వెల్లడించారు.
తల్లిదండ్రుల హక్కుల పరిరక్షణే లక్ష్యం
ఈ చట్టం ద్వారా వేలాది మంది వృద్ధులకు ఆర్థిక భరోసా లభిస్తుందని ప్రభుత్వం భావిస్తోంది. పిల్లలు తమ బాధ్యతను విస్మరిస్తే ఫిర్యాదు చేసేందుకు ప్రత్యేక యంత్రాంగాన్ని కూడా ఏర్పాటు చేయనున్నారు. తెలంగాణ అసెంబ్లీ తీసుకున్న ఈ నిర్ణయంపై సర్వత్రా హర్షం వ్యక్తమవుతోంది.