Asia Cup Hockey: భారత పురుషుల హాకీ జట్టు మరోసారి ఆసియా కప్‌ను తన ఖాతాలో వేసుకుంది. హర్మన్‌ప్రీత్ సింగ్ నాయకత్వంలో బీహార్‌లోని రాజ్‌గీర్ హాకీ స్టేడియంలో ఆదివారం జరిగిన ఫైనల్‌లో డిఫెండింగ్ ఛాంపియన్ సౌత్ కొరియాను 4-1 తేడాతో చిత్తు చేస్తూ భారత్ నాలుగోసారి ఈ టైటిల్‌ను గెలుచుకుంది. ఈ విజయంతో టీమిండియా నెదర్లాండ్స్‌, బెల్జియంలో జరగనున్న FIH పురుషుల హాకీ వరల్డ్ కప్ 2026కు నేరుగా అర్హత సాధించింది.
మ్యాచ్ హైలైట్స్
ఫైనల్ ప్రారంభమైన వెంటనే భారత జట్టు దూకుడు ప్రదర్శించింది. మొదటి నిమిషంలోనే సుఖ్‌జీత్ సింగ్ గోల్ చేసి టీమిండియాకు ముందంజ కల్పించాడు. తొలి అర్ధభాగం ముగియడానికి రెండు నిమిషాల ముందు దిల్ప్రీత్ సింగ్ రెండో గోల్‌తో ఆధిక్యాన్ని 2-0కు పెంచాడు.
ఇది కూడా చదవండి: Chase Teaser: ధోని ఇప్పుడు యాక్షన్ హీరో! ‘ది చేజ్’ టీజర్‌తో అభిమానులు ఫిదా!
రెండో హాఫ్‌లో కూడా భారత్ ఆధిపత్యం కొనసాగించింది. 45వ నిమిషంలో దిల్ప్రీత్ తన రెండో గోల్ సాధించగా, 50వ నిమిషంలో అమిత్ రోహిదాస్ మరో గోల్ చేసి స్కోరును 4-0కు చేర్చాడు. మ్యాచ్ ముగియడానికి మూడు నిమిషాలు ఉండగా కొరియా ఒక్క గోల్ చేసి గౌరవప్రద పరాజయం పొందింది.
అజేయంగా ఫైనల్ వరకు
కోచ్ క్రెయిగ్ ఫుల్టన్ మార్గదర్శకత్వంలో ఆడిన భారత్ టోర్నమెంట్‌లో ఒక్క మ్యాచ్ కూడా ఓడిపోకుండా అజేయంగా నిలిచింది. పూల్‌ స్టేజ్‌లో మూడు మ్యాచ్‌ల్లో మూడు విజయాలు సాధించగా, సూపర్-4లో రెండు విజయాలు, ఒక డ్రాతో ఫైనల్‌కు అర్హత సాధించింది. సూపర్-4లో కొరియాతో జరిగిన మ్యాచ్ డ్రాగా (2-2) ముగిసినప్పటికీ, ఫైనల్‌లో భారత్ పూర్ణ ఆధిపత్యం కనబర్చింది.
చరిత్ర సృష్టించిన భారత్
భారత్ ఈ విజయంతో ఆసియా కప్ టైటిల్స్ సంఖ్యను నాలుగుకు పెంచుకుంది. ఇంతకుముందు 2003, 2007, 2017లో భారత్ ఆసియా కప్‌ను గెలుచుకుంది. మొత్తం టైటిల్స్‌లో భారత్ కంటే ఎక్కువ సార్లు (5) ఆసియా కప్ గెలిచిన జట్టు దక్షిణ కొరియానే. ఈ సారి విజయంతో భారత్ మరియు కొరియా మధ్య ఫైనల్‌ల గణాంకం 2-2గా సమమైంది.
8 సంవత్సరాల నిరీక్షణ తర్వాత భారత హాకీ జట్టు మళ్లీ ఆసియా కప్‌ను గెలుచుకోవడం కేవలం టైటిల్ విజయం మాత్రమే కాదు; 2026 వరల్డ్ కప్‌కు నేరుగా ప్రవేశం కూడా కల్పించింది. ఈ విజయం టీమిండియా ప్రదర్శన స్థాయిని మరోసారి ప్రపంచానికి చాటి చెప్పింది.