TDP: తెలుగుదేశం పార్టీ తన సంస్థాగత నిర్మాణాన్ని మరింత పటిష్టం చేసే దిశగా మరో కీలక అడుగు వేసింది. ఇప్పటికే జిల్లా అధ్యక్షులను ఖరారు చేసిన అధిష్టానం, తాజాగా పార్లమెంటరీ పార్టీ కమిటీలను ప్రకటిస్తూ అధికారిక నిర్ణయం తీసుకుంది. పార్టీ బలోపేతమే లక్ష్యంగా మొత్తం 40 మంది సభ్యులతో కూడిన ఈ కమిటీలను రూపొందించినట్లు పార్టీ వర్గాలు వెల్లడించాయి.
ఈ కమిటీల కూర్పులో సామాజిక సమతుల్యతకు పెద్దపీట వేస్తూనే, అనుభవజ్ఞులకు, ఉత్సాహవంతులకు సముచిత స్థానం కల్పించారు. ప్రకటించిన వివరాల ప్రకారం, ఈ కమిటీలో 9 మంది ఉపాధ్యక్షులు, 9 మంది కార్యనిర్వాహక కార్యదర్శులు బాధ్యతలు చేపట్టనున్నారు. వీరితో పాటు మరో 9 మందిని అధికార ప్రతినిధులుగా, ఇంకో 9 మందిని కార్యదర్శులుగా నియమిస్తూ పార్టీ హైకమాండ్ నిర్ణయం తీసుకుంది. పార్టీ గళాన్ని సమర్థవంతంగా వినిపించేందుకు వివిధ స్థాయిల్లో సమన్వయం చేసేందుకు ఈ నియామకాలు దోహదపడతాయని భావిస్తున్నారు.
Also Read: Revanth Reddy: కేసీఆర్కు అసెంబ్లీ వేదికగా సవాల్ విసిరిన రేవంత్ రెడ్డి
కేవలం కార్యనిర్వాహక పదవులే కాకుండా, కమిటీ నిర్వహణను పర్యవేక్షించేందుకు ట్రెజరర్, కార్యాలయ కార్యదర్శి, మీడియా కోఆర్డినేటర్ పదవులను కూడా భర్తీ చేశారు. ఈ నూతన కమిటీల నియామకంపై ఇప్పటికే అన్ని జిల్లాల పార్టీ యంత్రాంగానికి స్పష్టమైన ఆదేశాలు అందాయి. రానున్న రోజుల్లో పార్లమెంటరీ నియోజకవర్గాల స్థాయిలో పార్టీ కార్యక్రమాలను మరింత వేగవంతం చేసేందుకు ఈ 40 మంది బృందం కీలక పాత్ర పోషించనుంది.