Stock Market: బడ్జెట్ రోజున భారీ పతనాన్ని చవిచూసిన దేశీయ స్టాక్ మార్కెట్లు, సోమవారం ట్రేడింగ్లో అనూహ్యంగా పుంజుకుని ఇన్వెస్టర్లలో కొత్త ఉత్సాహాన్ని నింపాయి. ప్రారంభంలో తీవ్రమైన ఒడిదుడుకులకు లోనైనప్పటికీ, ట్రేడింగ్ ముగిసే చివరి గంటలో కొనుగోళ్లు వెల్లువెత్తడంతో సూచీలు భారీ లాభాలను నమోదు చేశాయి. సెన్సెక్స్ ఏకంగా 944 పాయింట్లు పెరిగి 81,666 వద్ద స్థిరపడగా, నిఫ్టీ 263 పాయింట్లు లాభపడి 25,088 వద్ద ముగిసింది. 2020 తర్వాత బడ్జెట్ రోజున మార్కెట్లు ఇంతలా పతనం కావడం ఇదే మొదటిసారి అయినప్పటికీ, ఒక్క రోజులోనే ఆ నష్టాల నుంచి కోలుకోవడం విశేషం.
మార్కెట్ గమనాన్ని పరిశీలిస్తే, ఒక దశలో 80,387 కనిష్ఠ స్థాయికి పడిపోయిన సెన్సెక్స్, అక్కడి నుంచి ఏకంగా 1,345 పాయింట్లు రికవరీ అయ్యి 81,732 గరిష్ఠ స్థాయిని తాకింది. నిఫ్టీ కూడా 24,679 స్థాయి నుంచి కోలుకుని 25,108 గరిష్ఠానికి చేరుకుంది. ముఖ్యంగా అదానీ పోర్ట్స్, భారత్ ఎలక్ట్రానిక్స్, ఎల్&టీ వంటి సంస్థలతో పాటు బ్యాంకింగ్ రంగంలోని హెచ్డీఎఫ్సీ, ఐసీఐసీఐ బ్యాంక్ షేర్లకు భారీగా మద్దతు లభించింది. పవర్గ్రిడ్ షేరు ఏకంగా 7.6 శాతం లాభపడి సెన్సెక్స్లో అగ్రస్థానంలో నిలిచింది.
మరోవైపు మార్కెట్లలో భయాన్ని సూచించే ఇండియా VIX సూచీ 8 శాతం తగ్గడం ఇన్వెస్టర్ల నమ్మకాన్ని పెంచింది. రంగాల వారీగా చూస్తే ఆటో, మెటల్, రియల్టీ రంగాలు లాభాల్లో దూసుకుపోగా, ఐటీ రంగం మాత్రం స్వల్ప నష్టాలను చవిచూసింది. మిడ్క్యాప్, స్మాల్క్యాప్ సూచీలు కూడా సానుకూలంగా ముగిశాయి. బడ్జెట్ తర్వాత మార్కెట్లలో నెలకొన్న అనిశ్చితి క్రమంగా తొలగుతూ, బుల్ రన్ మళ్లీ మొదలైనట్లు కనిపిస్తోందని విశ్లేషకులు భావిస్తున్నారు.