Shah Rukh Khan Injured: బాలీవుడ్ బాద్షా షారుఖ్ ఖాన్ తాజాగా గాయపడ్డారని వార్తలు వస్తున్నాయి. ఆయన నటిస్తున్న “కింగ్” సినిమా షూటింగ్లో ఈ ఘటన జరిగినట్లు తెలుస్తోంది. ముంబైలోని గోల్డెన్ టొబాకో స్టూడియోలో భారీ యాక్షన్ సన్నివేశాల కోసం ప్రత్యేక సెట్ వేశారు. ఆ యాక్షన్ సీన్ చిత్రీకరణలో షారుఖ్ కండరాలకు గాయం అయినట్లు సమాచారం.
అత్యవసరంగా అమెరికాకు బయలుదేరిన షారుఖ్
గాయాల కారణంగా వెంటనే షారుఖ్ టీమ్ ఆయనను అత్యవసర వైద్య సహాయం కోసం అమెరికాకు తీసుకెళ్లినట్లు బాలీవుడ్ మీడియా పేర్కొంది. గతంలో కూడా షారుఖ్ కండరాల సమస్యతో ఇబ్బంది పడ్డారు. ఈసారి కూడా అదే సమస్య మళ్లీ రావడంతో చికిత్స అవసరమైందని చెబుతున్నారు. అయితే అభిమానులు పెద్దగా ఆందోళన చెందాల్సిన అవసరం లేదని, షారుఖ్ పరిస్థితి స్థిరంగా ఉందని మీడియా తెలిపింది.
వైద్యుల సూచన ప్రకారం విశ్రాంతి
వైద్యులు షారుఖ్ ఖాన్కి కనీసం ఒక నెల విశ్రాంతి అవసరమని సలహా ఇచ్చినట్లు సమాచారం. అయితే ఈ వార్తలపై షారుఖ్ టీమ్ లేదా ఆయన వ్యక్తిగత మేనేజర్ పూజా దద్లాని నుంచి ఇంకా ఎటువంటి అధికారిక ప్రకటన రాలేదు.
ఇది కూడా చదవండి: Shilpa Shirodkar: జీవితంపై విరక్తి కలిగిందంటున్న మహేష్ మరదలు!
కింగ్ సినిమా వివరాలు
బాలీవుడ్లో అత్యంత ఆసక్తిగా ఎదురుచూస్తున్న సినిమాల్లో “కింగ్” కూడా ఒకటి. ఈ సినిమాకు సుజయ్ ఘోష్ దర్శకత్వం వహిస్తుండగా, సిద్ధార్థ్ ఆనంద్ నిర్మిస్తున్నారు. ఇందులో షారుఖ్ ఖాన్తో పాటు ఆయన కుమార్తె సుహానా ఖాన్ కీలక పాత్రలో నటిస్తున్నారు. అభిషేక్ బచ్చన్ విలన్గా నటిస్తుండగా, దీపికా పదుకొణె, రాణి ముఖర్జీ, అనిల్ కపూర్, జాకీ ష్రాఫ్ తదితరులు కీలక పాత్రల్లో కనిపించనున్నారు.
షారుఖ్ ఖాన్ కెరీర్
షారుఖ్ ఖాన్ ఇప్పటివరకు 80కి పైగా సినిమాలు చేశారు. 14 ఫిలింఫేర్ అవార్డులు అందుకున్నారు. 2023లో విడుదలైన పఠాన్, జవాన్, డంకీ సినిమాలతో భారీ విజయాలు సాధించారు. కొంత విరామం తీసుకున్న తర్వాత ఇప్పుడు మళ్లీ “కింగ్” సినిమాతో బిజీ అవుతున్నారు.