Maoist: దేశంలో మావోయిస్టుల ఉనికిని పూర్తిగా తుడిచిపెట్టే లక్ష్యంతో కేంద్ర భద్రతా బలగాలు దండకారణ్యంలో మెరుపు దాడులను ముమ్మరం చేశాయి. ఇటీవల మావోయిస్టు పార్టీలోని కీలక నాయకుడు, మోస్ట్ వాంటెడ్ హిడ్మా (Hidma), అతని భార్యతో సహా ఆరుగురు అంగరక్షకులు మృతి చెందడం ఈ దాడుల తీవ్రతను స్పష్టం చేస్తోంది. హిడ్మా మరణం మావోయిస్టులకు ఒక గట్టి ఎదురుదెబ్బగా పరిగణించవచ్చు.
ఆల్ ఇండియా డీజీపీల భేటీ కీలకం:
ఈ నెల 28 నుంచి 30 వరకు దేశంలో అత్యంత కీలకమైన ఆల్ ఇండియా డీజీపీల సమావేశం జరగనుంది. ఈ సమావేశం ఎజెండాలో ప్రధానంగా మావోయిస్టుల ఏరివేత, ఆపరేషన్ కగార్ (Operation Kagar), ఉగ్రవాద దాడుల నిరోధం వంటి అంశాలు ఉన్నాయి. ఈ సమావేశం కంటే ముందే మావోయిస్టుల ప్రాబల్యాన్ని పూర్తిగా అణచివేయాలని కేంద్ర ప్రభుత్వం అత్యంత వేగంగా ముప్పేట దాడికి (Triple-pronged attack) వ్యూహాలు రచిస్తోంది.
ఇది కూడా చదవండి: Supreme Court: బిల్లుల ఆమోదంపై గవర్నర్లకు గడువు విధించలేం
తెలంగాణ SIB ప్రత్యేక ప్రణాళిక:
మావోయిస్టుల అగ్రనేతలను లొంగిపోయేలా చేయడమే లక్ష్యంగా తెలంగాణ ఎస్‌ఐబీ (SIB) అధికారులు పక్కా వ్యూహాలను సిద్ధం చేస్తున్నారు. బలం కంటే ఉపాయంతోనే లొంగుబాట్లను పెంచేందుకు ప్రయత్నిస్తున్నారు.
ఏవోబీలో కూంబింగ్ ఉధృతి – కోర్టుకెక్కిన అగ్రనేతల మిస్సింగ్ కథనం:
మరోవైపు, మావోయిస్టు పార్టీలోని మరో ఇద్దరు అగ్రనేతలు… దేవ్‌జీ (Devji) అలియాస్ తిప్పిరి తిరుపతి, మల్లా రాజిరెడ్డి (Malla Reddy)ల కోసం ఆంధ్ర-ఒడిశా సరిహద్దు (AOB) ప్రాంతంలో కూంబింగ్ ఆపరేషన్లను భద్రతా బలగాలు మరింత ఉధృతం చేశాయి.
అయితే, ఈ కీలక పరిణామాల మధ్య ఒక ఊహించని మలుపు చోటు చేసుకుంది. తెలంగాణకు చెందిన గంగాధర్ (Gangadhar) అనే వ్యక్తి వీరిద్దరి ‘మిస్సింగ్’పై ఆంధ్రప్రదేశ్ హైకోర్టులో హేబియస్ కార్పస్ పిటిషన్ దాఖలు చేశారు.
ఈ నెల 18న పోలీసులు దేవ్‌జీ, మల్లా రాజిరెడ్డిలను అక్రమంగా నిర్బంధంలోకి తీసుకున్నారని ఆ పిటిషన్‌లో గంగాధర్ పేర్కొన్నారు. మావోయిస్టులు తిప్పిరి తిరుపతి, మల్లా రాజిరెడ్డిలను కోర్టులో ప్రవేశపెట్టాలని అయన అన్నారు. ఈ పిటిషన్ రేపు (నవంబర్ 21) ఆంధ్రప్రదేశ్ హైకోర్టు ధర్మాసనం ఎదుటకు విచారణకు రానుంది.
ఈ పరిణామాల నేపథ్యంలో, హైకోర్టు విచారణ ఫలితం, దండకారణ్యంలో కేంద్ర బలగాల తదుపరి చర్యలు ఎలా ఉంటాయనేది దేశవ్యాప్తంగా ఉత్కంఠను రేకెత్తిస్తున్నాయి.