Sana Javed: పాకిస్థానీ నటి సనా జావేద్ సోషల్ మీడియాలో చేసిన ఒక వ్యాఖ్య ప్రస్తుతం తీవ్ర దుమారం రేపుతోంది. ఇటీవల దుబాయ్ వెకేషన్లో ఉన్న సనా, తన ఫోటోలను ఇన్స్టాగ్రామ్లో షేర్ చేశారు. ఆ ఫోటోలు చూసిన ఆమె స్నేహితురాలు సరదాగా స్పందిస్తూ.. “నాకు ఈ ఫోటోగ్రాఫర్ కావాలి” (షోయబ్ మాలిక్ను ఉద్దేశించి) అని కామెంట్ చేశారు. దీనికి సనా బదులిస్తూ.. “నా భర్తను నేను ఎవరికీ ఇవ్వలేను” అని వ్యాఖ్యానించారు.
సనా సరదాగా చేసిన ఈ వ్యాఖ్యపై నెటిజన్లు తీవ్రస్థాయిలో విరుచుకుపడ్డారు. ముఖ్యంగా షోయబ్ మాలిక్ మాజీ భార్య, భారత టెన్నిస్ స్టార్ సానియా మీర్జాను ఉద్దేశించి పలువురు నెటిజన్లు ఘాటుగా స్పందించారు. “నువ్వు ఇతరుల భర్తలను లాక్కోగలవు కానీ, నీ భర్తను మాత్రం ఎవరికీ ఇవ్వవా?” అని ఒక వినియోగదారుడు ప్రశ్నించగా, “సనా.. అతను నీ భర్త కాదు, నువ్వు వేరొకరి నుండి లాక్కున్నావు” అంటూ మరికొందరు విమర్శించారు.
ఇది కూడా చదవండి: Veng sarkar: సర్ఫరాజ్ను సెలెక్ట్ చేయకపోవడం సిగ్గుచేటు
షోయబ్ మాలిక్, సనా జావేద్ జంట 2024 జనవరిలో వివాహం చేసుకున్నప్పటి నుండి నిరంతరం ట్రోలింగ్ను ఎదుర్కొంటూనే ఉన్నారు. షోయబ్ మాలిక్కు ఇది మూడవ వివాహం. గతంలో ఆయన ఆయేషా సిద్ధిఖీని, ఆ తర్వాత సానియా మీర్జాను వివాహం చేసుకున్నారు. సానియాతో విడిపోయిన కొద్ది రోజులకే సనాను పెళ్లి చేసుకోవడం అప్పట్లో సంచలనం సృష్టించింది. మరోవైపు సనా జావేద్ కూడా తన మొదటి భర్త, సింగర్ ఉమైర్ జస్వాల్తో 2023లో విడాకులు తీసుకున్న సంగతి తెలిసిందే.
రెండేళ్లు గడుస్తున్నా, ఈ జంట షేర్ చేసే ప్రతి పోస్ట్ కింద పాత జ్ఞాపకాలను, విడాకుల అంశాలను ప్రస్తావిస్తూ నెటిజన్లు కామెంట్లు పెడుతున్నారు. సనా చేసిన తాజా వ్యాఖ్య వారి పట్ల ఉన్న వ్యతిరేకతను మరోసారి బయటపెట్టింది. సానియా మీర్జా అభిమానులు ఇప్పటికీ షోయబ్ మాలిక్ తీరును తప్పుబడుతూ సోషల్ మీడియాలో పోస్టులు పెడుతున్నారు.