Saina and Parupalli Kashyap: ఇటీవ‌లే విడిపోతున్నట్టు ప్ర‌క‌టించిన భారత బ్యాడ్మింటన్ స్టార్ జంట సైనా నెహ్వాల్ – పారుపల్లి కశ్యప్ ఇప్పుడు మళ్లీ ఒక్క‌ట‌వుతున్న‌ట్టు ప్ర‌క‌టించారు. ఈ విష‌యాన్ని సైనా త‌న ఇన్‌స్టాగ్రామ్‌లో పోస్ట్ చేస్తూ తెలియ‌జేశారు.
“కొన్నిసార్లు దూరం వల్ల బంధాల విలువ తెలుస్తుంది. మేమిద్దరం మళ్లీ ప్రయత్నిస్తున్నాం” అంటూ కశ్యప్‌తో ఉన్న ఫొటోను షేర్ చేశారు. ఈ పోస్ట్ చూసిన అభిమానులు ఆనందాన్ని వ్యక్తం చేస్తున్నారు.
విడాకుల ప్రకటన షాక్ ఇచ్చిన సంగతి తెలిసిందే
గత నెలలో వీరిద్దరూ తమ ఏడేళ్ల వివాహ బంధానికి ముగింపు పలుకుతున్నట్టు ప్రకటించగా, అభిమానులు షాక్‌కు గురయ్యారు. “జీవితం ఒక్కోసారి కొత్త మార్గాల్లో నడిపిస్తుంది. ఎంతో ఆలోచించి, చర్చించిన తర్వాత మేం విడిపోవాలని నిర్ణయించుకున్నాం” అని సైనా అప్పట్లో పేర్కొన్నారు.
2018లో ప్రేమకు ముడిపెట్టిన బంధం
సైనా, కశ్యప్ ఇద్దరూ హైదరాబాద్‌లోని పుల్లెల గోపీచంద్ అకాడమీలో శిక్షణ పొందుతుండగా స్నేహితులయ్యారు. ఆ స్నేహం ప్రేమగా మారి, 2018లో ఇద్దరూ వివాహ బంధంలోకి అడుగుపెట్టారు.
Also Read: MLC Kavitha: రేపు కవిత నిరాహార దీక్ష
సైనా కెరీర్ అంచుల వద్ద..
గత కొంతకాలంగా గాయాల కారణంగా సైనా ఆటకు దూరంగా ఉంటున్నారు. చివరిసారిగా 2023 జూన్‌లో ప్రొఫెషనల్ టోర్నీ ఆడారు. ఆర్థరైటిస్ కారణంగా ఆమె ఫామ్ కోల్పోయినట్టు వెల్లడించారు. ప్రపంచ నెం.1 ర్యాంక్‌ సాధించిన ఏకైక భారత మహిళా బ్యాడ్మింటన్ ప్లేయర్‌గా ఆమె రికార్డు నెలకొల్పారు. ఆమెకు అర్జున అవార్డు (2009), ఖేల్ రత్న (2010) లాంటి గౌరవాలు లభించాయి.
కశ్యప్ కోచింగ్ దిశగా
పారుపల్లి కశ్యప్ ప్రొఫెషనల్ బ్యాడ్మింటన్‌కు గుడ్‌బై చెప్పి కోచింగ్‌పై దృష్టిపెట్టారు. 2014 కామన్వెల్త్ గేమ్స్‌లో స్వర్ణం గెలిచి దేశానికి గర్వకారణంగా నిలిచారు. 32 ఏళ్ల తర్వాత కామన్వెల్త్‌లో గోల్డ్ మెడల్ గెలిచిన తొలి భారత బ్యాడ్మింటన్ ఆటగాడు అన్న గౌరవం ఆయనకే.
అభిమానుల హర్షం
ఇటీవల విడిపోతున్నట్టు చెప్పిన ఈ జంట మళ్లీ కలుస్తూ ప్రకటించడం అభిమానుల్లో సంతోషాన్ని నింపింది. వారి బంధం మళ్లీ నూతనంగా వెలిగిపోవాలని అందరూ ఆకాంక్షిస్తున్నారు.
View this post on Instagram