Drinking Time: ప్రపంచవ్యాప్తంగా పర్యాటకులను ఆకర్షించే ప్రదేశాలలో థాయిలాండ్ అగ్రస్థానంలో ఉంటుంది. అద్భుతమైన బీచ్‌లు, నోరూరించే స్ట్రీట్ ఫుడ్, మరియు ఉత్సాహభరితమైన నైట్ లైఫ్‌కు ప్రసిద్ధి చెందిన ఈ దేశం.. ఇప్పుడు మద్యపానానికి సంబంధించి కఠినమైన కొత్త నిబంధనలను అమలులోకి తెచ్చింది. ఈ నిబంధనలు మద్యపాన ప్రియులైన పర్యాటకులకు, స్థానిక వ్యాపారులకు సమస్యగా మారాయి.
నిర్ణీత వేళల్లో మద్యం తాగితే జరిమానా
థాయిలాండ్ ప్రభుత్వం సవరించిన మద్య పానీయాల నియంత్రణ చట్టాన్ని నవంబర్ 8 నుంచి అమలులోకి తెచ్చింది. ఈ కొత్త నియమాల ప్రకారం:
థాయిలాండ్‌లో మధ్యాహ్నం 2:00 గంటల నుంచి సాయంత్రం 5:00 గంటల వరకు మద్యం సేవించడం పూర్తిగా నిషేధం. ఈ నిబంధనలను ఉల్లంఘించిన వారికి 10,000 థాయ్ బాట్ భారీ జరిమానా విధిస్తారు. ఇది భారత కరెన్సీ ప్రకారం సుమారు రూ. 27,357 ఉంటుంది.
నిబంధనల కఠినత్వం
కొత్త చట్టంలోని కఠిన నిబంధనల పట్ల పర్యాటకులు ఆశ్చర్యం వ్యక్తం చేస్తున్నారు. ఈ ఉత్తర్వు ప్రకారం, మధ్యాహ్నం 1:59 గంటలకు బీరు కొనుగోలు చేసి, 2:05 గంటల వరకు దాన్ని తాగినా కూడా ఉల్లంఘనగా పరిగణించి జరిమానా విధిస్తారు. అంటే, కేవలం కొనుగోలు చేయడమే కాదు, నిర్ణీత వేళల్లో మద్యం సేవించడం కూడా నిషేధమే. సాధారణంగా పర్యాటకులు వీధి ఆహారంతో కలిసి తమకు సౌలభ్యం మేరకు మద్యం ఆస్వాదిస్తారు. తాజా నిబంధనలు వారి అలవాట్లకు అడ్డుకట్ట వేయనున్నాయి.
ఇది కూడా చదవండి: Hockey Player Died: లక్నోలో రోడ్డు ప్రమాదం… జాతీయ హాకీ క్రీడాకారిణి దుర్మరణం!
వ్యాపారుల ఆందోళన
ప్రభుత్వం తీసుకున్న ఈ నిర్ణయం వల్ల తమ వ్యాపారం తీవ్రంగా నష్టపోతుందని రెస్టారెంట్ యజమానులు మరియు స్థానిక వ్యాపారులు ఆందోళన వ్యక్తం చేస్తున్నారు. పర్యాటక రంగం ఇప్పుడిప్పుడే కోలుకుంటున్న తరుణంలో ఈ కొత్త నియమాలు వ్యాపారంపై ప్రతికూల ప్రభావం చూపుతాయని వారు వాదిస్తున్నారు.
ప్రపంచవ్యాప్తంగా ఉన్న థాయిలాండ్ ప్రేమికులు, తమ ట్రిప్ ప్లాన్‌ను మార్చుకోవాల్సిన పరిస్థితి ఏర్పడింది. ఈ కఠిన సమయపాలనపై ప్రభుత్వం మళ్లీ సమీక్ష చేస్తుందేమో చూడాలి.