Ramchandra rao: పంచాయతీ ఎన్నికలను ఉద్దేశపూర్వకంగా జాప్యం చేయడం వల్లే తెలంగాణ గ్రామాలకు రావాల్సిన నిధులు పూర్తిగా ఆగిపోయాయని తెలంగాణ బీజేపీ రాష్ట్ర అధ్యక్షుడు రాంచందర్రావు తీవ్ర ఆరోపణలు చేశారు. గ్రామీణ ప్రాంతాల అభివృద్ధి నిలిచిపోవడానికి రాష్ట్ర ప్రభుత్వ నిర్లక్ష్యమే కారణమని ఆయన మండిపడ్డారు
గ్రామ పంచాయతీలకు అందాల్సిన నిధుల్లో సుమారు రూ.3 వేల కోట్లు పూర్తిగా కేంద్ర ప్రభుత్వమే ఇస్తోందని రాంచందర్రావు స్పష్టం చేశారు. అయితే రాష్ట్ర ప్రభుత్వం మాత్రం గ్రామాలకు తగిన నిధులు కేటాయించడంలో పూర్తిగా విఫలమైందని విమర్శించారు. “కేంద్రం వేల కోట్ల రూపాయలు ఇస్తుంటే, రాష్ట్రం ఇచ్చింది గాడిదగుడ్డు మాత్రమే” అంటూ తీవ్ర వ్యాఖ్యలు చేశారు.
పంచాయతీ ఎన్నికలు జరగకపోవడం వల్ల కేంద్రం నుంచి రావాల్సిన అనేక అభివృద్ధి నిధులు నిలిచిపోయాయని, దీని వల్ల గ్రామాల్లో మౌలిక వసతులు, అభివృద్ధి పనులు పూర్తిగా దెబ్బతిన్నాయని అన్నారు. ప్రజాప్రతినిధులు లేక గ్రామ పాలన అస్తవ్యస్తంగా మారిందని ఆరోపించారు.
రాజకీయ పరిణామాలపై కూడా రాంచందర్రావు ఆసక్తికర వ్యాఖ్యలు చేశారు. కాంగ్రెస్, బీఆర్ఎస్ పార్టీలను కలిపే ప్రయత్నాల్లో ఎంఐఎం కీలక పాత్ర పోషిస్తోందని ఆయన ఆరోపించారు. భవిష్యత్లో కాంగ్రెస్, బీఆర్ఎస్, ఎంఐఎం పార్టీలు మూడు కలిసి ఎన్నికలకు వెళ్లడం ఖాయమని జోస్యం చెప్పారు. ప్రజలను మభ్యపెట్టేందుకే ఈ రాజకీయ నాటకాలు ఆడుతున్నారని విమర్శించారు.
అదే సమయంలో ఫిరాయింపుల చట్టాన్ని కాంగ్రెస్ పార్టీ బహిరంగంగానే ఉల్లంఘించిందని రాంచందర్రావు ఆరోపించారు. ప్రజాస్వామ్య విలువలను కాంగ్రెస్ తుంగలో తొక్కుతోందని, రాజ్యాంగాన్ని గౌరవించకుండా వ్యవహరిస్తోందని తీవ్ర స్థాయిలో మండిపడ్డారు.
గ్రామాల అభివృద్ధి, ప్రజాస్వామ్య పరిరక్షణ కోసం బీజేపీ నిరంతరం పోరాటం చేస్తుందని, పంచాయతీ ఎన్నికలను వెంటనే నిర్వహించాలని ఆయన రాష్ట్ర ప్రభుత్వాన్ని డిమాండ్ చేశారు.