Hyderabad: తెలంగాణ రాష్ట్రంలో రాబోయే ఐదు రోజుల పాటు విస్తారంగా వర్షాలు కురిసే అవకాశం ఉందని హైదరాబాద్‌ వాతావరణ కేంద్రం హెచ్చరించింది. ఉరుములు, మెరుపులతో పాటు గంటకు 30 నుంచి 40 కిలోమీటర్ల వేగంతో ఈదురు గాలులు వీచే అవకాశముందని తెలిపింది. ఈ మేరకు శనివారం సాయంత్రం ఒక ప్రకటన విడుదల చేసింది.
వాతావరణ శాఖ అంచనాలు:
అక్టోబర్‌ 25 (శనివారం): రాష్ట్రవ్యాప్తంగా తేలికపాటి నుంచి మోస్తరు వర్షాలు కురుస్తాయి.
అక్టోబర్‌ 26 (ఆదివారం): ఆదిలాబాద్‌, కొమరంభీం ఆసిఫాబాద్‌, నిర్మల్‌, నిజామాబాద్‌, హైదరాబాద్‌, రంగారెడ్డి, సంగారెడ్డి జిల్లాల్లో ఉరుములు, మెరుపులతో కూడిన వర్షాలు కురిసే అవకాశం.
అక్టోబర్‌ 27: వర్షాల తీవ్రత మరింత పెరుగనుంది. జయశంకర్‌ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్‌ జిల్లాల్లో భారీ వర్షాలు కురిసే సూచనలు ఉన్నాయి.
అక్టోబర్‌ 28, 29: పెద్దపల్లి, వరంగల్‌, కరీంనగర్‌, ఆదిలాబాద్‌ సహా పలు ఉమ్మడి జిల్లాల్లో భారీ నుంచి అతి భారీ వర్షాలు పడే అవకాశం ఉంది.
అక్టోబర్‌ 30 తర్వాత: వర్షాల తీవ్రత క్రమంగా తగ్గుతుందని వాతావరణ శాఖ తెలిపింది.
ప్రజలు అప్రమత్తంగా ఉండాలి:
భారీ వర్షాల నేపథ్యంలో లోతట్టు ప్రాంతాలు జలమయం కావడం, ట్రాఫిక్‌ అంతరాయాలు, విద్యుత్‌ స్తంభాలు, చెట్లు నేలకొరిగే ప్రమాదం ఉందని హెచ్చరించింది.
రైతులు, ప్రజలు సురక్షిత ప్రాంతాల్లో ఉండాలని, పాత భవనాలకు దూరంగా ఉండాలని సూచించింది. జిల్లా యంత్రాంగాలు తగిన సహాయక చర్యలకు సిద్ధంగా ఉండాలని వాతావరణ శాఖ ఆదేశాలు జారీ చేసింది.