Rahul Gandhi: కాంగ్రెస్ అగ్రనేత రాహుల్ గాంధీ ఎన్నికల సంఘం పనితీరుపై తీవ్ర అనుమానాలు వ్యక్తం చేశారు. ఎన్నికల సంఘం నిష్పక్షపాతంగా వ్యవహరించడం లేదని ఆరోపిస్తూ, ఆయన ఐదు కీలక ప్రశ్నలను సంధించారు. ప్రజాస్వామ్యంలో ఎన్నికల ప్రక్రియ పారదర్శకంగా ఉండాలని, కానీ ప్రస్తుత పరిస్థితులు ఆందోళన కలిగిస్తున్నాయని రాహుల్ అన్నారు.
రాహుల్ గాంధీ అడిగిన ఆ ఐదు ప్రశ్నలు ఇవి:
డిజిటల్ ఓటర్ల జాబితా ఎందుకు ఇవ్వడం లేదు?
ప్రతి ఎన్నికల్లోనూ ఓటర్ల జాబితా చాలా కీలకం. ఎన్నికల సంఘం ఈ జాబితాను డిజిటల్ రూపంలో రాజకీయ పార్టీలకు, ప్రజలకు ఎందుకు ఇవ్వడం లేదని రాహుల్ ప్రశ్నించారు. ఈ జాబితాను దాచిపెట్టడం వెనుక ఏదైనా ఉద్దేశ్యం ఉందా అని ఆయన సందేహం వ్యక్తం చేశారు.
సీసీటీవీ ఆధారాలు ఎందుకు నాశనం అవుతున్నాయి?
ఎన్నికల సమయంలో పోలింగ్ బూత్లలో సీసీటీవీ కెమెరాలు ఉంటాయి. ఎన్నికల అక్రమాలకు సంబంధించిన ఆధారాలు దొరకకుండా, ఈ సీసీటీవీ ఫుటేజీలు ఎందుకు నాశనం అవుతున్నాయని రాహుల్ గాంధీ ప్రశ్నించారు. ఇది చాలా సీరియస్ విషయం అని ఆయన అన్నారు.
నకిలీ ఓటర్ల జాబితా ఎందుకు తారుమారైంది?
కొన్ని నియోజకవర్గాల్లో నకిలీ ఓటర్లు ఉన్నారని ఆరోపణలు వస్తున్నాయి. ఈ విషయంలో ఎన్నికల సంఘం సరైన చర్యలు తీసుకోవడం లేదని, జాబితా ఎందుకు తారుమారైందని రాహుల్ అడిగారు.
ప్రతిపక్ష నాయకులను ఎందుకు బెదిరిస్తున్నారు?
ఎన్నికల సమయంలో ప్రతిపక్ష నాయకులను బెదిరిస్తున్నారని, ఇది ప్రజాస్వామ్యానికి మంచిది కాదని రాహుల్ అన్నారు. ఈ బెదిరింపులకు ఎన్నికల సంఘం ఎందుకు చర్యలు తీసుకోవడం లేదని ఆయన ప్రశ్నించారు.
బీజేపీకి ఎన్నికల సంఘం ఏజెంట్గా మారిందా?
రాహుల్ గాంధీ సంధించిన ఐదో ప్రశ్న చాలా తీవ్రమైనది. ఎన్నికల సంఘం భారతీయ జనతా పార్టీ (బీజేపీ)కి ఏజెంట్గా మారిందా అని ఆయన నేరుగా ప్రశ్నించారు. ఈ ఆరోపణ ఎన్నికల వ్యవస్థపై ప్రజల్లో ఉన్న విశ్వాసాన్ని దెబ్బతీసేదిగా ఉంది.
గతంలో కూడా ఆరోపణలు..
ఇంతకుముందు కూడా రాహుల్ గాంధీ ఎన్నికల సంఘంపై ఇలాంటి ఆరోపణలే చేశారు. బీహార్ ఓటర్ల జాబితాలో పెద్ద ఎత్తున నకిలీ ఓటర్లు ఉన్నారని, ఒకే ఇంటి నెంబర్పై వేల ఓట్లు ఉన్నాయని ఆయన మీడియా సమావేశంలో ప్రెజెంటేషన్ ఇచ్చారు. అలాగే హర్యానా, మధ్యప్రదేశ్, మహారాష్ట్ర ఎన్నికల ఫలితాలపై కూడా అనుమానాలు ఉన్నాయని రాహుల్ గాంధీ అన్నారు.